dil juda mal juda jaan juda lete hain

dil judā maal judā jaan judā lete haiñ

apne sab kaam bigaḌ kar vo banā lete haiñ

ho hī rahtā hai kisī but kā nazāra tā-shām

sub.h ko uTh ke jo ham nām-e-ḳhudā lete haiñ

majlis-e-vāz meñ jab baiThte haiñ ham mai-kash

duḳhtar-e-raz ko bhī pahlū meñ biThā lete haiñ

aise bose ke evaz māñgte haiñ dil kyā ḳhuub

jī meñ socheñ to vo kyā dete haiñ kyā lete haiñ

apnī mahfil se uThā.e haiñ abas ham ko huzūr

chupke baiThe haiñ alag aap kā kyā lete haiñ

but bhī kyā chiiz haiñ allāh salāmat rakkhe

gāliyāñ de ke ġharīboñ kī duā lete haiñ

shāḳh-e-marjāñ meñ javāhar nazar aate haiñ 'amīr'

kabhī uñglī jo vo dāñtoñ meñ dabā lete haiñ

dil juda mal juda jaan juda lete hain

apne sab kaam bigaD kar wo bana lete hain

ho hi rahta hai kisi but ka nazara ta-sham

subh ko uTh ke jo hum nam-e-KHuda lete hain

majlis-e-waz mein jab baiThte hain hum mai-kash

duKHtar-e-raz ko bhi pahlu mein biTha lete hain

aise bose ke ewaz mangte hain dil kya KHub

ji mein sochen to wo kya dete hain kya lete hain

apni mahfil se uThae hain abas hum ko huzur

chupke baiThe hain alag aap ka kya lete hain

but bhi kya chiz hain allah salamat rakkhe

galiyan de ke gharibon ki dua lete hain

shaKH-e-marjaan mein jawahar nazar aate hain 'amir'

kabhi ungli jo wo danton mein daba lete hain