dil ka muamla hai kahan tak nihan rahe

dil kā mu'āmla hai kahāñ tak nihāñ rahe

ash'ār hāl-e-dil mirā kar ke 'ayāñ rahe

tark-e-ta'alluqāt kā mujh ko gila nahīñ

hai dil ke ās-pās vo chāhe jahāñ rahe

jaarī mushā'iron meñ hai shirkat kā silsila

achchhā hai shā'irī kā tasalsul ravāñ rahe

the dil meñ jā-guzīn bahut aise log bhī

nāyāb ho ga.e haiñ vo zinda kahāñ rahe

jaañ vaar dī hai ham ne zarūrat paḌī agar

kuchh dost mere phir bhī bahut bad-gumāñ rahe

kuchh zindagī ke pal yuuñ muqaddar hoñ aahoñ kā

qātil kā tiir gar jo darūn-e-kamāñ rahe

be-mā'nī phir lageñge mohabbat ke saare naam

ik terā naam hī mire vird-e-zabāñ rahe

kahne ko e'tibār use mujh pe thā magar

kuchh vasvase to lagtā hai phir bhī nihāñ rahe

dil ka mu'amla hai kahan tak nihan rahe

ash'ar haal-e-dil mera kar ke 'ayan rahe

tark-e-ta'alluqat ka mujh ko gila nahin

hai dil ke aas-pas wo chahe jahan rahe

jari musha'iron mein hai shirkat ka silsila

achchha hai sha'iri ka tasalsul rawan rahe

the dil mein ja-guzin bahut aise log bhi

nayab ho gae hain wo zinda kahan rahe

jaan war di hai hum ne zarurat paDi agar

kuchh dost mere phir bhi bahut bad-guman rahe

kuchh zindagi ke pal yun muqaddar hon aahon ka

qatil ka tir gar jo darun-e-kaman rahe

be-ma'ni phir lagenge mohabbat ke sare nam

ek tera nam hi mere wird-e-zaban rahe

kahne ko e'tibar use mujh pe tha magar

kuchh waswase to lagta hai phir bhi nihan rahe