dil ka ye dasht arsa-e-mahshar laga mujhe

dil kā ye dasht arsa-e-mahshar lagā mujhe

maiñ kyā balā huuñ raat baḌā Dar lagā mujhe

aage bhī ishq meñ huiiñ rusvā.iyāñ magar

ab ke vafā kā zaḳhm jabīñ par lagā mujhe

ai dil vo mehrbāñ hai yūñhī bad-gumāñ na ho

maarā thā us ne ġhair ko patthar lagā mujhe

har sū tire vajūd kī ḳhushbū thī ḳhema-zan

vo din ki apnā ghar bhī tirā ghar lagā mujhe

hañs kar na Taal jā ki ye ummīd kī kiran

vo tiir hai ki siine ke andar lagā mujhe

tārīki-e-hayāt kā andāza kar ki aaj

dāġh-e-shikast mahr-e-munavvar lagā mujhe

sāñche to the ġhazal ke sivā bhī magar 'zafar'

kyā jaane kyuuñ ye zarf hasīn-tar lagā mujhe

dil ka ye dasht arsa-e-mahshar laga mujhe

main kya bala hun raat baDa Dar laga mujhe

aage bhi ishq mein huin ruswaiyan magar

ab ke wafa ka zaKHm jabin par laga mujhe

ai dil wo mehrban hai yunhi bad-guman na ho

mara tha us ne ghair ko patthar laga mujhe

har su tere wajud ki KHushbu thi KHema-zan

wo din ki apna ghar bhi tera ghar laga mujhe

hans kar na Tal ja ki ye ummid ki kiran

wo tir hai ki sine ke andar laga mujhe

tariki-e-hayat ka andaza kar ki aaj

dagh-e-shikast mahr-e-munawwar laga mujhe

sanche to the ghazal ke siwa bhi magar 'zafar'

kya jaane kyun ye zarf hasin-tar laga mujhe