dil ke aaine mein kuchh chehre jo gauhar Thahre

dil ke ā.īne meñ kuchh chehre jo gauhar Thahre

un ko nazdīk se dekhā to vo patthar Thahre

aaj kāzib bhī ye chāhe hai ki farmān us kā

saarī duniyā pe chale qaul-e-payambar Thahre

dil kā vīrāna bhī mumkin hai mo.attar ho jaa.e

kaun jaane ki ik-ik zaḳhm gul-e-tar Thahre

zulm sahnā bhī to zālim kī taraf-dārī hai

tum bhī muusā bano gar vaqt sitamgar Thahre

un ke dāman pe nazar aa.e lahū ke chhīñTe

amn-o-insāf ke jo log payambar Thahre

ziist kā raaz khulā hai usī dīvāne par

raqs-e-ḳhanjar jise mahbūb kā paikar Thahre

apnī bhī zaat kā irfān nahīñ hai jin ko

ahd-e-hāzir meñ bashar ke vahī rahbar Thahre

kī thī hamvār kabhī jin ke liye rāh-e-hayāt

ab vahī log mirī raah kā patthar Thahre

kaise ārām kā aa jaa.e ḳhayāl ai 'mehdī'

zindagī jab kisī bīmār kā bistar Thahre

dil ke aaine mein kuchh chehre jo gauhar Thahre

un ko nazdik se dekha to wo patthar Thahre

aaj kazib bhi ye chahe hai ki farman us ka

sari duniya pe chale qaul-e-payambar Thahre

dil ka virana bhi mumkin hai moattar ho jae

kaun jaane ki ik-ik zaKHm gul-e-tar Thahre

zulm sahna bhi to zalim ki taraf-dari hai

tum bhi musa bano gar waqt sitamgar Thahre

un ke daman pe nazar aae lahu ke chhinTe

amn-o-insaf ke jo log payambar Thahre

zist ka raaz khula hai usi diwane par

raqs-e-KHanjar jise mahbub ka paikar Thahre

apni bhi zat ka irfan nahin hai jin ko

ahd-e-hazir mein bashar ke wahi rahbar Thahre

ki thi hamwar kabhi jin ke liye rah-e-hayat

ab wahi log meri rah ka patthar Thahre

kaise aaram ka aa jae KHayal ai 'mehdi'

zindagi jab kisi bimar ka bistar Thahre