dil ke andar ek zara si be-kali hai aaj bhi

dil ke andar ik zarā sī be-kalī hai aaj bhī

jo mire afkār meñ ras gholtī hai aaj bhī

yuuñ to vo dīvār ban ke aa gayā hai darmiyāñ

merī apne aap se kuchh dostī hai aaj bhī

pattharoñ par chal ke sab ne paañv zaḳhmī kar liye

jabki us ke dar kā rasta maḳhmalī hai aaj bhī

ruḳh havāoñ kā badalnā jānte haiñ log jo

bas unhīñ ke har diye meñ raushnī hai aaj bhī

jin savāloñ kā nahīñ hotā koī musbat javāb

un savāloñ se ulajhtā aadmī hai aaj bhī

sīkhtā hai yuuñ to insāñ har tarīqe kī zabāñ

sab se āsāñ sab se behtar ḳhāmushī hai aaj bhī

jis ke chalte maiñ ne DhūñDe the ka.ī raste na.e

DhūñDhtī mujh ko vahī āvārgī hai aaj bhī

kitne Duube kitne ubhre kyā ḳhabar un ko 'faroġh'

bah rahī chup-chāp yuuñ hī har nadī hai aaj bhī

dil ke andar ek zara si be-kali hai aaj bhi

jo mere afkar mein ras gholti hai aaj bhi

yun to wo diwar ban ke aa gaya hai darmiyan

meri apne aap se kuchh dosti hai aaj bhi

pattharon par chal ke sab ne panw zaKHmi kar liye

jabki us ke dar ka rasta maKHmali hai aaj bhi

ruKH hawaon ka badalna jaante hain log jo

bas unhin ke har diye mein raushni hai aaj bhi

jin sawalon ka nahin hota koi musbat jawab

un sawalon se ulajhta aadmi hai aaj bhi

sikhta hai yun to insan har tariqe ki zaban

sab se aasan sab se behtar KHamushi hai aaj bhi

jis ke chalte main ne DhunDe the kai raste nae

DhunDhti mujh ko wahi aawargi hai aaj bhi

kitne Dube kitne ubhre kya KHabar un ko 'farogh'

bah rahi chup-chap yun hi har nadi hai aaj bhi