dil ke be-tartib virane ko ghar usne kiya

dil ke be-tartīb vīrāne ko ghar us ne kiyā

phir nizām-e-zindagī zer-o-zabar us ne kiyā

aas ke raushan diye rakh kar fasīl-e-shām par

raat ke andhe safar ko be-ḳhatar us ne kiyā

ek us ke dam se har mausam huā rashk-e-bahār

ek shāḳh-e-ārzū ko be-samar us ne kiyā

an-kahe lafzoñ ko baḳhshā ik nayā tarz-e-kalām

an-bahe ashkoñ ko phir la.al-o-gohar us ne kiyā

be-qarārī thī jise sunñe-sunāne ke liye

harf-e-shauq-e-be-karāñ ko muḳhtasar us ne kiyā

ḳhvāb meñ milnā to goyā roz kā ma.amūl thā

is anokhe khel ko yuuñ mo'atabar us ne kiyā

umr-bhar jis ko nigāheñ DhūñDhtī phirtī raheñ

umr-bhar mere ḳhayāloñ meñ basar us ne kiyā

kar rahā thā vo bhī taare toḌ kar laane kī baat

be-sabab lamhoñ kā jaadū be-asar us ne kiyā

kahkashāñ phirtī rahī galiyoñ meñ kis ko DhūñDhtī

log kahte haiñ mire ghar tak safar us ne kiyā

dil ke be-tartib virane ko ghar us ne kiya

phir nizam-e-zindagi zer-o-zabar us ne kiya

aas ke raushan diye rakh kar fasil-e-sham par

raat ke andhe safar ko be-KHatar us ne kiya

ek us ke dam se har mausam hua rashk-e-bahaar

ek shaKH-e-arzu ko be-samar us ne kiya

an-kahe lafzon ko baKHsha ek naya tarz-e-kalam

an-bahe ashkon ko phir lal-o-gohar us ne kiya

be-qarari thi jise sunne-sunane ke liye

harf-e-shauq-e-be-karan ko muKHtasar us ne kiya

KHwab mein milna to goya roz ka mamul tha

is anokhe khel ko yun mo'atabar us ne kiya

umr-bhar jis ko nigahen DhunDhti phirti rahen

umr-bhar mere KHayalon mein basar us ne kiya

kar raha tha wo bhi tare toD kar lane ki baat

be-sabab lamhon ka jadu be-asar us ne kiya

kahkashan phirti rahi galiyon mein kis ko DhunDhti

log kahte hain mere ghar tak safar us ne kiya