dil ke dagh numayan honge zaKHmon ki ruswai hogi

dil ke daaġh numāyāñ hoñge zaḳhmoñ kī rusvā.ī hogī

zālim ke andāz na pūchho apnī baat parā.ī hogī

har jā sāzish har jā pahre ek zamāna dushman sā hai

sochtā huuñ ik shoḳh ne kaise pyaar se aañkh milā.ī hogī

shahr-e-vafā kā dushman hai tū jitnā chāhe ġhārat kar le

kal to aañkh milā kar ham se aañkh tirī sharmā.ī hogī

jhāñk rahe ho duur se ab tak shītal nain kañval meñ kyā kyā

Duub ke dekho in āñkhoñ meñ kitnī hī gahrā.ī hogī

mānte haiñ is daur meñ 'sarmad' dhuum machī hai ayyāroñ kī

jaag uThā insān to ik din har jānib sachchā.ī hogī

dil ke dagh numayan honge zaKHmon ki ruswai hogi

zalim ke andaz na puchho apni baat parai hogi

har ja sazish har ja pahre ek zamana dushman sa hai

sochta hun ek shoKH ne kaise pyar se aankh milai hogi

shahr-e-wafa ka dushman hai tu jitna chahe ghaarat kar le

kal to aankh mila kar hum se aankh teri sharmai hogi

jhank rahe ho dur se ab tak shital nain kanwal mein kya kya

Dub ke dekho in aankhon mein kitni hi gahrai hogi

mante hain is daur mein 'sarmad' dhum machi hai ayyaron ki

jag uTha insan to ek din har jaanib sachchai hogi