dil ke dar par qufl paDa hai tum bhi chup ho hum bhi chup

dil ke dar par qufl paḌā hai tum bhī chup ho ham bhī chup

ḳhāmoshī ab shart-e-vafā hai tum bhī chup ho ham bhī chup

be-sautī ab saut-o-sadā hai tum bhī chup ho ham bhī chup

lafzoñ kā dam TuuT gayā hai tum bhī chup ho ham bhī chup

kal tak to jhankār salāsil kī thī jiine kā paiġhām

aaj ye kaisā vaqt paḌā hai tum bhī chup ho ham bhī chup

gulshan gulshan sahrā sahrā kis ne phūñkā aisā fusūñ

ik ik taa.ir sañg huā hai tum bhī chup ho ham bhī chup

dil se rishta TuuT gayā hai ab to zabāñ kā bhī 'shiblī'

is se baḌh kar koī sazā hai tum bhī chup ho ham bhī chup

dil ke dar par qufl paDa hai tum bhi chup ho hum bhi chup

KHamoshi ab shart-e-wafa hai tum bhi chup ho hum bhi chup

be-sauti ab saut-o-sada hai tum bhi chup ho hum bhi chup

lafzon ka dam TuT gaya hai tum bhi chup ho hum bhi chup

kal tak to jhankar salasil ki thi jine ka paigham

aaj ye kaisa waqt paDa hai tum bhi chup ho hum bhi chup

gulshan gulshan sahra sahra kis ne phunka aisa fusun

ek ek tair sang hua hai tum bhi chup ho hum bhi chup

dil se rishta TuT gaya hai ab to zaban ka bhi 'shibli'

is se baDh kar koi saza hai tum bhi chup ho hum bhi chup