dil ke gulshan mein chali baad-e-saba raat gae

dil ke gulshan meñ chalī bād-e-sabā raat ga.e

ḳhuub chhā.ī tirī yādoñ kī ghaTā raat ga.e

jazba-e-'ishq ne har tarh ke bandhan toḌe

vo nibhāne jo chalā rasm-e-vafā raat ga.e

zaḳhm khul uThte haiñ jazbāt bhaḌak uThte haiñ

un ke kūche se jo aatī hai havā raat ga.e

khil uThe ġhuncha-e-nau bū-e-saman jaag uThī

jaise niklā hai koī māh-laqā raat ga.e

aaj maazī ke darīchoñ se hai jhāñkā kis ne

zaḳhm-e-derīna meñ kyoñ dard uThā raat ga.e

phuul māyūsī ke sahrā meñ bhī khil jaate haiñ

jab bhī hotā hai koī naġhma-sarā raat ga.e

dil ke gulshan mein chali baad-e-saba raat gae

KHub chhai teri yaadon ki ghaTa raat gae

jazba-e-'ishq ne har tarh ke bandhan toDe

wo nibhane jo chala rasm-e-wafa raat gae

zaKHm khul uThte hain jazbaat bhaDak uThte hain

un ke kuche se jo aati hai hawa raat gae

khil uThe ghuncha-e-nau bu-e-saman jag uThi

jaise nikla hai koi mah-laqa raat gae

aaj mazi ke darichon se hai jhanka kis ne

zaKHm-e-derina mein kyon dard uTha raat gae

phul mayusi ke sahra mein bhi khil jate hain

jab bhi hota hai koi naghma-sara raat gae