dil ke har dard ne ashaar mein Dhalna chaha

dil ke har dard ne ash.ār meñ Dhalnā chāhā

apnā pairāhan-e-be-rañg badalnā chāhā

koī an-jānī sī tāqat thī jo aaḌe aa.ī

varna ham ne to bahar-gām sambhalnā chāhā

chāhte to kisī patthar kī tarah jī lete

ham ne ḳhud mom kī mānind pighalnā chāhā

āñkheñ jalne lagīñ tapte hue bāzāroñ meñ

dil ne jab bhī kisī manzar pe machalnā chāhā

sirf ham hī nahīñ har ek ne jiine ke liye

ik na ik jhūTe sahāre se bahalnā chāhā

kaun hai ye jo sisaktā hai mire siine meñ

kaun hai jis ne mire ḳhuun pe palnā chāhā

dil ke har dard ne ashaar mein Dhalna chaha

apna pairahan-e-be-rang badalna chaha

koi an-jaani si taqat thi jo aaDe aai

warna hum ne to bahar-gam sambhalna chaha

chahte to kisi patthar ki tarah ji lete

hum ne KHud mom ki manind pighalna chaha

aankhen jalne lagin tapte hue bazaron mein

dil ne jab bhi kisi manzar pe machalna chaha

sirf hum hi nahin har ek ne jine ke liye

ek na ek jhuTe sahaare se bahalna chaha

kaun hai ye jo sisakta hai mere sine mein

kaun hai jis ne mere KHun pe palna chaha