dil ke jazbaat ko honTon se dabaate kyon ho

dil ke jazbāt ko hoñToñ se dabāte kyoñ ho

aag lag jaane do sho'loñ ko bujhāte kyoñ ho

mujh ko aana hai to vaise bhī chalā ā.ūñgā

rahne do raah meñ phūloñ ko bichhāte kyoñ ho

thoḌī der aur mire dil kī sadā.eñ sun lo

itnī jaldī hai jo jaane kī to aate kyoñ ho

ham-safar tum nahīñ hoge to bhaTak jā.ūñgā

raah meñ chhoḌ ke tanhā mujhe jaate kyoñ ho

tum ko in se na mayassar kabhī ḳhushbū hogī

kāġhazī phūloñ se gul-dān sajāte kyoñ ho

ham ne har-hāl meñ ulfat kā bharam rakhā hai

bevafā ham haiñ ye ilzām lagāte kyoñ ho

un ko 'farmān' sunāo to koī baat bane

ġham kī rūdād zamāne ko sunāte kyoñ ho

dil ke jazbaat ko honTon se dabaate kyon ho

aag lag jaane do sho'lon ko bujhate kyon ho

mujh ko aana hai to waise bhi chala aaunga

rahne do rah mein phulon ko bichhate kyon ho

thoDi der aur mere dil ki sadaen sun lo

itni jaldi hai jo jaane ki to aate kyon ho

ham-safar tum nahin hoge to bhaTak jaunga

rah mein chhoD ke tanha mujhe jate kyon ho

tum ko in se na mayassar kabhi KHushbu hogi

kaghazi phulon se gul-dan sajate kyon ho

hum ne har-haal mein ulfat ka bharam rakha hai

bewafa hum hain ye ilzam lagate kyon ho

un ko 'farman' sunao to koi baat bane

gham ki rudad zamane ko sunate kyon ho