dil ke kabe ko gira deta hai Darta bhi nahin

dil ke kā'be ko girā detā hai Dartā bhī nahīñ

kaun hai hajjāj-bin-yūsuf jo martā bhī nahīñ

ye sitāra āsmāñ kī is tamāshā-gāh meñ

Duub jaatā hai to dobāra ubhartā bhī nahīñ

dhuup kaisī hai jo is paanī meñ ghultī hī nahīñ

rang kaisā hai jo she'roñ se utartā bhī nahīñ

shor hotā jā rahā hai lahreñ ruktī hī nahīñ

peḌ ugte jā rahe haiñ dasht bhartā bhī nahīñ

aañkh hai jo jazb kar letī hai har manzar kahīñ

ye samundar hai ki jo bhar kar biphartā bhī nahīñ

ye zamīñ ye chāñd sayyāre haiñ sab daryūza-gar

asl meñ sūraj kahīñ nīche utartā bhī nahīñ

is meñ be-rangī kī āmezish zarūrī hai bahut

rang ik ho to ziyāda din Thahartā bhī nahīñ

rafta-rafta ham banā lete haiñ vo īmāñ kā juz

jo taqāzā ham se ḳhud īmān kartā bhī nahīñ

maut se kis ko mafar hotā hai lekin aadmī

baat ye hai asl meñ ik baar martā bhī nahīñ

dil ke ka'be ko gira deta hai Darta bhi nahin

kaun hai hajjaj-bin-yusuf jo marta bhi nahin

ye sitara aasman ki is tamasha-gah mein

Dub jata hai to dobara ubharta bhi nahin

dhup kaisi hai jo is pani mein ghulti hi nahin

rang kaisa hai jo she'ron se utarta bhi nahin

shor hota ja raha hai lahren rukti hi nahin

peD ugte ja rahe hain dasht bharta bhi nahin

aankh hai jo jazb kar leti hai har manzar kahin

ye samundar hai ki jo bhar kar bipharta bhi nahin

ye zamin ye chand sayyare hain sab daryuza-gar

asl mein suraj kahin niche utarta bhi nahin

is mein be-rangi ki aamezish zaruri hai bahut

rang ek ho to ziyaada din Thaharta bhi nahin

rafta-rafta hum bana lete hain wo iman ka juz

jo taqaza hum se KHud iman karta bhi nahin

maut se kis ko mafar hota hai lekin aadmi

baat ye hai asl mein ek bar marta bhi nahin