dil ke zaKHmon se chaman mein shor barpa kar diya

dil ke zaḳhmoñ se chaman meñ shor barpā kar diyā

maiñ ne phūloñ meñ hañsī kā terī charchā kar diyā

apnī vahshat apnī badnāmī kā mujh ko ġham nahīñ

us kā ronā hai ki maiñ ne tujh ko rusvā kar diyā

phir marīz-e-ġham na bolā dekh kar zālim tujhe

āñkhoñ hī āñkhoñ meñ ye kyā kah diyā kyā kar diyā

sāmne tum aa ga.e maiñ dil pakaḌ kar rah gayā

merī qismat se davā ne dard paidā kar diyā

haa.e ab koī Thikānā ārzūoñ kā nahīñ

dil kī bastī luuT lī zālim ne ye kyā kar diyā

chāñdnī kā raat ik dariyā banāyā maah ne

motiyoñ se maiñ ne par ro-ro ke dariyā kar diyā

merī mayyat par vo aayā sab hue mahv-e-jamāl

maut ko bhī merī zālim ne tamāshā kar diyā

ab shuā-e-husn-e-pur-anvār hai nazzāra soz

terī is be-pardagī ne ḳhud hī parda kar diyā

dasht-gardī kī badaulat chaar tinke chun liye

āshiyāñ kā merī vahshat ne sahārā kar diyā

kyā sadā thī sunñe vaale dil pakaḌ kar rah ga.e

tere nāloñ ne to 'afsar' hashr barpā kar diyā

dil ke zaKHmon se chaman mein shor barpa kar diya

main ne phulon mein hansi ka teri charcha kar diya

apni wahshat apni badnami ka mujh ko gham nahin

us ka rona hai ki main ne tujh ko ruswa kar diya

phir mariz-e-gham na bola dekh kar zalim tujhe

aankhon hi aankhon mein ye kya kah diya kya kar diya

samne tum aa gae main dil pakaD kar rah gaya

meri qismat se dawa ne dard paida kar diya

hae ab koi Thikana aarzuon ka nahin

dil ki basti luT li zalim ne ye kya kar diya

chandni ka raat ek dariya banaya mah ne

motiyon se main ne par ro-ro ke dariya kar diya

meri mayyat par wo aaya sab hue mahw-e-jamal

maut ko bhi meri zalim ne tamasha kar diya

ab shua-e-husn-e-pur-anwar hai nazzara soz

teri is be-pardagi ne KHud hi parda kar diya

dasht-gardi ki badaulat chaar tinke chun liye

aashiyan ka meri wahshat ne sahaara kar diya

kya sada thi sunne wale dil pakaD kar rah gae

tere nalon ne to 'afsar' hashr barpa kar diya