dil ki aah-e-na-rasa su-e-falak jati hai kab

dil kī āh-e-nā-rasā sū-e-falak jaatī hai kab

ḳhvāhisheñ kitnī bhī puurī hoñ lalak jaatī hai kab

hai shikasta dil agar nādāñ to is kā ġham na kar

TuuT jaane par bhī motī kī Dalak jaatī hai kab

miT ga.e haiñ ishq meñ har chiiz hai faanī magar

baad murjhāne ke phūloñ kī mahak jaatī hai kab

gar zamāne ne satāyā hai to koī ġham nahīñ

baaġh meñ pāmāl ġhunchoñ kī chaTak jaatī hai kab

hai zabāñ par qufl kah saktā nahīñ tū hāl-e-dil

hoñT siine se anādil kī chahak jaatī hai kab

sabr kar mazlūm kā koī ziyāñ hotā nahīñ

kāTiye jitnā bhī hiire kī damak jaatī hai kab

jal rahā hai tū agar hālāt kī bhaTTī meñ aaj

aag meñ jalne se sone kī chamak jaatī hai kab

zulm ke bār-e-garāñ se dab na jā phir uTh ke baiTh

sar kuchal dene se sabze kī lahak jaatī hai kab

nā-musā'id haiñ agar hālāt un se jang kar

bādaloñ meñ ghir ke bijlī kī kaḌak jaatī hai kab

va.ada-e-fardā pe un ke aaj bhī īmān hai

maan lene se magar dil kī dhaḌak jaatī hai kab

dil ki aah-e-na-rasa su-e-falak jati hai kab

KHwahishen kitni bhi puri hon lalak jati hai kab

hai shikasta dil agar nadan to is ka gham na kar

TuT jaane par bhi moti ki Dalak jati hai kab

miT gae hain ishq mein har chiz hai fani magar

baad murjhane ke phulon ki mahak jati hai kab

gar zamane ne sataya hai to koi gham nahin

bagh mein pamal ghunchon ki chaTak jati hai kab

hai zaban par qufl kah sakta nahin tu haal-e-dil

honT sine se anadil ki chahak jati hai kab

sabr kar mazlum ka koi ziyan hota nahin

kaTiye jitna bhi hire ki damak jati hai kab

jal raha hai tu agar haalat ki bhaTTi mein aaj

aag mein jalne se sone ki chamak jati hai kab

zulm ke bar-e-garan se dab na ja phir uTh ke baiTh

sar kuchal dene se sabze ki lahak jati hai kab

na-musa'id hain agar haalat un se jang kar

baadalon mein ghir ke bijli ki kaDak jati hai kab

wada-e-farda pe un ke aaj bhi iman hai

man lene se magar dil ki dhaDak jati hai kab