dil ki basti pe kisi dard ka saya bhi nahin

dil kī bastī pe kisī dard kā saaya bhī nahīñ

aisā vīrānī kā mausam kabhī aayā bhī nahīñ

ham kisī aur hī aalam meñ rahā karte haiñ

ahl-e-duniyā ne jahāñ aake satāyā bhī nahīñ

ham pe is ālam-e-tāza meñ guzartī kyā hai

tum ne pūchhā bhī nahīñ ham ne batāyā bhī nahīñ

kab se huuñ ġharq kisī jhiil kī gahrā.ī meñ

rāz-e-ayyām magar aql ne paayā bhī nahīñ

be-zamīnī kā ye dukh aur zamīñ bhī apnī

bebasī aisī ki nukta ye uThāyā bhī nahīñ

be-jihat uThte hue Thokareñ khāte ye qadam

rāhbar merā mujhe raah pe laayā bhī nahīñ

us ne hamdardī ke paimāñ to bahut bāñdhe the

aa paḌī hai to mirā haath baTāyā bhī nahīñ

dil kī dīvāroñ se lipTī hai kisī shaam kī yaad

jaane vaalā to kabhī lauT ke aayā bhī nahīñ

sard-mehrī ki jigar chhalnī kiye detī hai

us ne yuuñ dekhne meñ haath chhuḌāyā bhī nahīñ

us se ummīd-e-vafā bāñdh rakhī hai 'shāhid'

jis ne ye baar mohabbat kā uThāyā bhī nahīñ

dil ki basti pe kisi dard ka saya bhi nahin

aisa virani ka mausam kabhi aaya bhi nahin

hum kisi aur hi aalam mein raha karte hain

ahl-e-duniya ne jahan aake sataya bhi nahin

hum pe is aalam-e-taza mein guzarti kya hai

tum ne puchha bhi nahin hum ne bataya bhi nahin

kab se hun gharq kisi jhil ki gahrai mein

raaz-e-ayyam magar aql ne paya bhi nahin

be-zamini ka ye dukh aur zamin bhi apni

bebasi aisi ki nukta ye uThaya bhi nahin

be-jihat uThte hue Thokaren khate ye qadam

rahbar mera mujhe rah pe laya bhi nahin

us ne hamdardi ke paiman to bahut bandhe the

aa paDi hai to mera hath baTaya bhi nahin

dil ki diwaron se lipTi hai kisi sham ki yaad

jaane wala to kabhi lauT ke aaya bhi nahin

sard-mehri ki jigar chhalni kiye deti hai

us ne yun dekhne mein hath chhuDaya bhi nahin

us se ummid-e-wafa bandh rakhi hai 'shahid'

jis ne ye bar mohabbat ka uThaya bhi nahin