dil ki is wahshat-sara mein dard kya jazbaat kya

dil kī is vahshat-sarā meñ dard kyā jazbāt kyā

ho zamīñ banjar agar to be-bahā barsāt kyā

khul gayā thā ik darīcha niiñd meñ ta.abīr kā

varna ai ḳhvāb-e-pareshāñ thī tirī auqāt kyā

nam hai kyoñ dāman sahar kā shiddat-e-ehsās se

mil ga.ī us ko bhī dard-e-ishq kī sauġhāt kyā

ātish-e-furqat chhupā.e sham.a kyoñ rotī rahī

vasl kī baazī meñ us ko ho rahī hai maat kyā

is chaman kī vahshatoñ meñ ho ga.ī shāmil sabā

pūchhtī hai phuul se ab rang kyā hai zaat kyā

siskiyoñ ke shādiyāne gūñjte haiñ kaan meñ

sahn-e-dil meñ dard kī utrī koī bārāt kyā

ghar rahā na tū rahā na dil rahā na āshiqī

zindagī sahtī rahegī nit-na.e sadmāt kyā

har taraf sargoshiyoñ kī sang-bārī al-amāñ

kar rahā hai ye zamāna phir hamārī baat kyā

sub.h kī bhīgī huī āñkhoñ meñ kaisā soz hai

ḳhāmushī oḌhe hue rotī rahī hai raat kyā

ham pe ye uqda khulā hai zindagī ko haar kar

koshish-e-tadbīr kyā hai gardish-e-hālāt kyā

ho gayā labrez kyūñkar kāsa-e-husn-e-suḳhan

kūcha-e-ġhālib se paa.ī sher kī ḳhairāt kyā

ho ke rusvā ishq ke bāzār-e-hasrat meñ 'shakīl'

'mīr' kī ḳhātir luTā dī izzat-e-sādāt kyā

dil ki is wahshat-sara mein dard kya jazbaat kya

ho zamin banjar agar to be-baha barsat kya

khul gaya tha ek daricha nind mein tabir ka

warna ai KHwab-e-pareshan thi teri auqat kya

nam hai kyon daman sahar ka shiddat-e-ehsas se

mil gai us ko bhi dard-e-ishq ki saughat kya

aatish-e-furqat chhupae shama kyon roti rahi

wasl ki bazi mein us ko ho rahi hai mat kya

is chaman ki wahshaton mein ho gai shamil saba

puchhti hai phul se ab rang kya hai zat kya

siskiyon ke shadiyane gunjte hain kan mein

sahn-e-dil mein dard ki utri koi baraat kya

ghar raha na tu raha na dil raha na aashiqi

zindagi sahti rahegi nit-nae sadmat kya

har taraf sargoshiyon ki sang-bari al-aman

kar raha hai ye zamana phir hamari baat kya

subh ki bhigi hui aankhon mein kaisa soz hai

KHamushi oDhe hue roti rahi hai raat kya

hum pe ye uqda khula hai zindagi ko haar kar

koshish-e-tadbir kya hai gardish-e-haalat kya

ho gaya labrez kyunkar kasa-e-husn-e-suKHan

kucha-e-ghaalib se pai sher ki KHairaat kya

ho ke ruswa ishq ke bazar-e-hasrat mein 'shakil'

'mir' ki KHatir luTa di izzat-e-sadat kya