dil ki KHalish se chain na aae to kya karun

dil kī ḳhalish se chain na aa.e to kyā karūñ

bantī nahīñ hai baat banā.e to kyā karūñ

ishq-e-butāñ ko maiñ ne to samjhā thā dil-lagī

ye dil-lagī bhī dil ko jalā.e to kyā karūñ

maiñ jaam se piyūñ to gunahgār-e-mai-kashī

nazroñ se apnī koī pilā.e to kyā karūñ

maiñ ne hazār baar bhulāyā tumheñ magar

dil se tumhārī yaad na jaa.e to kyā karūñ

tujh sā dikhā.ūñ aur bhī koī tujhe magar

aa.ina bhī na sāmne aa.e to kyā karūñ

maanā ki bār-e-zīst kuchh aisā girāñ nahīñ

ye bhī magar uThāyā na jaa.e to kyā karūñ

har ik ḳhushī bhī hotī hai mujh ko payām-e-ġham

hañste hī hañste aañkh bhar aa.e to kyā karūñ

maiñ un se apnā qissa-e-ġham kah to duuñ magar

koī nazar hī ab na milā.e to kyā karūñ

jis ke liye jahān se begāna ho gayā

vo bhī na 'sehr' apnā batā.e to kyā karūñ

dil ki KHalish se chain na aae to kya karun

banti nahin hai baat banae to kya karun

ishq-e-butan ko main ne to samjha tha dil-lagi

ye dil-lagi bhi dil ko jalae to kya karun

main jam se piyun to gunahgar-e-mai-kashi

nazron se apni koi pilae to kya karun

main ne hazar bar bhulaya tumhein magar

dil se tumhaari yaad na jae to kya karun

tujh sa dikhaun aur bhi koi tujhe magar

aaina bhi na samne aae to kya karun

mana ki bar-e-zist kuchh aisa giran nahin

ye bhi magar uThaya na jae to kya karun

har ek KHushi bhi hoti hai mujh ko payam-e-gham

hanste hi hanste aankh bhar aae to kya karun

main un se apna qissa-e-gham kah to dun magar

koi nazar hi ab na milae to kya karun

jis ke liye jahan se begana ho gaya

wo bhi na 'sehr' apna batae to kya karun