dil ki qimat ghaT jati hai izhaar-e-jazbaat ke baad

dil kī qīmat ghaT jaatī hai iz.hār-e-jazbāt ke baad

suunā suunā ghar kā āñgan lagtā hai bārāt ke baad

sāñsoñ kī ik maalā thī jo be-ḳhabarī meñ TuuT ga.ī

aur bhalā kyā nazr karūñ maiñ dil jaisī sauġhāt ke baad

aur izāfa ho jaatā hai āñkhoñ kī vīrānī meñ

kaun sā mausam aa jaatā hai ashkoñ kī barsāt ke baad

mujh ko dekh ke hañsne vaalo kis ko ye daulat miltī hai

is manzil par maiñ pahūñchā huuñ jaane kin hālāt ke baad

kis kī yaad meñ uljhā uljhā aaheñ bhartā phirtā hai

kis kā naam liyā kartā hai dīvāna har baat ke baad

prem divāna terā 'vasī' ye pāgal ko samjhā.e kaun

is baazī meñ jiit huā kartī hai lekin maat ke baad

dil ki qimat ghaT jati hai izhaar-e-jazbaat ke baad

suna suna ghar ka aangan lagta hai baraat ke baad

sanson ki ek mala thi jo be-KHabari mein TuT gai

aur bhala kya nazr karun main dil jaisi saughat ke baad

aur izafa ho jata hai aankhon ki virani mein

kaun sa mausam aa jata hai ashkon ki barsat ke baad

mujh ko dekh ke hansne walo kis ko ye daulat milti hai

is manzil par main pahuncha hun jaane kin haalat ke baad

kis ki yaad mein uljha uljha aahen bharta phirta hai

kis ka nam liya karta hai diwana har baat ke baad

prem diwana tera 'wasi' ye pagal ko samjhae kaun

is bazi mein jit hua karti hai lekin mat ke baad