dil ki shikastagi hai KHub dil ki shaguftagi na dekh

dil kī shikastagī hai ḳhuub dil kī shaguftagī na dekh

hañste hue sarishk dekh rotī huī hañsī na dekh

husn kī sarḳhushī na dekh ishq kī ḳhastagī na dekh

bātin-e-dil pe kar nigāh sūrateñ zāhirī na dekh

puḳhta-o-jāvedāñ nahīñ tere nikhār kī bahār

dekh mirī nigāh meñ aa.ine meñ abhī na dekh

ishq kī azmatoñ ke saath sajde haiñ tere paañv par

zarf to hai mirā buland merī fatādgī na dekh

ārif-e-husn-e-zāt ko kyā hai ġharaz sifāt se

chāñd hai dekhne kī chiiz chāñd kī chāñdnī na dekh

jis kā hai tujh ko intizār hogā zarūr āshkār

ālam-e-be-ḳhudī meñ aa ā.ina-e-ḳhudī na dekh

dil ke shikasta saaz ke joḌ rahā huuñ taar maiñ

de mujhe fursat-e-nazar dil kī taraf abhī na dekh

daulat-e-ulfat-o-vafā mujh ko ḳhudā ne kī atā

dil hai mirā bharā bharā haath mire tahī na dekh

ismat-e-husn be-gumāñ terī nazar meñ hai nihāñ

jis se lagāv ho tujhe us kī taraf kabhī na dekh

'mauj' safīna-e-hayāt bahr-e-vafā meñ chhoḌ de

josh baḌhā huā na dekh lahr uThī huī na dekh

dil ki shikastagi hai KHub dil ki shaguftagi na dekh

hanste hue sarishk dekh roti hui hansi na dekh

husn ki sarKHushi na dekh ishq ki KHastagi na dekh

baatin-e-dil pe kar nigah suraten zahiri na dekh

puKHta-o-jawedan nahin tere nikhaar ki bahaar

dekh meri nigah mein aaine mein abhi na dekh

ishq ki azmaton ke sath sajde hain tere panw par

zarf to hai mera buland meri fatadgi na dekh

aarif-e-husn-e-zat ko kya hai gharaz sifat se

chand hai dekhne ki chiz chand ki chandni na dekh

jis ka hai tujh ko intizar hoga zarur aashkar

aalam-e-be-KHudi mein aa aaina-e-KHudi na dekh

dil ke shikasta saz ke joD raha hun tar main

de mujhe fursat-e-nazar dil ki taraf abhi na dekh

daulat-e-ulfat-o-wafa mujh ko KHuda ne ki ata

dil hai mera bhara bhara hath mere tahi na dekh

ismat-e-husn be-guman teri nazar mein hai nihan

jis se lagaw ho tujhe us ki taraf kabhi na dekh

'mauj' safina-e-hayat bahr-e-wafa mein chhoD de

josh baDha hua na dekh lahr uThi hui na dekh