dil ki taskin ki dawa kya hai

dil kī taskīn kī davā kyā hai

dostoñ se bhalā chhupā kyā hai

is zamāne ko kyā pata kyā hai

mere kamre kā aa.ina kiyā hai

ye lahū to nahīñ mire mahbūb

terī rag rag meñ dauḌtā kyā hai

hijr ke din visāl kī rāteñ

chāhne vaale chāhtā kyā hai

ishq tanhā.ī shā.erī cigarette

aur is ke sivā bachā kyā hai

un ke dar se uThā to bhuul gayā

ghar ko jaane kā rāsta kyā hai

sar ko sajde meñ rakh diyā jaa.e

ishq kā aur tarjuma kyā hai

vo jo mash.hūr kar rahā hai mujhe

mere baare meñ jāntā kyā hai

rāsta jab na rok paayā sitam

phir ye talvoñ kā aabla kyā hai

jism do ek ho ga.e kah kar

āshiqī meñ tirā mirā kyā hai

ruk ga.e kahte kahte is dil meñ

us ne jis vaqt ye kahā kyā hai

ḳhair achchhā huā ke ai 'hānī'

vo na samjhe ke mājrā kyā hai

dil ki taskin ki dawa kya hai

doston se bhala chhupa kya hai

is zamane ko kya pata kya hai

mere kamre ka aaina kiya hai

ye lahu to nahin mere mahbub

teri rag rag mein dauDta kya hai

hijr ke din visal ki raaten

chahne wale chahta kya hai

ishq tanhai shaeri cigarette

aur is ke siwa bacha kya hai

un ke dar se uTha to bhul gaya

ghar ko jaane ka rasta kya hai

sar ko sajde mein rakh diya jae

ishq ka aur tarjuma kya hai

wo jo mashhur kar raha hai mujhe

mere bare mein jaanta kya hai

rasta jab na rok paya sitam

phir ye talwon ka aabla kya hai

jism do ek ho gae kah kar

aashiqi mein tera mera kya hai

ruk gae kahte kahte is dil mein

us ne jis waqt ye kaha kya hai

KHair achchha hua ke ai 'hani'

wo na samjhe ke majra kya hai