dil ki turbat mein koi dard daba hai ab bhi

dil kī turbat meñ koī dard dabā hai ab bhī

aisā lagtā hai koī zaḳhm harā hai ab bhī

har sitāre ko tirā naam de ke kah dūñgā

merī duniyā kā faqat ek ḳhudā hai ab bhī

muntazir huuñ ki ye jiine kī amāvas guzre

raat ke siine meñ ik chāñd chhupā hai ab bhī

bin marāsim bhī na vo ġhair huā mujh se kabhī

maiñ kisī aur kā huuñ aur vo mirā hai ab bhī

apnā dushman hī banātā hai mohabbat kā junūn

sarfaroshī kī vahī ishq-adā hai ab bhī

ḳhauf ye hai ki judā.ī ke to dukhḌe haiñ hazār

shukr ye hai ki mohabbat meñ maza hai ab bhī

yaad kar kar ke tujhe ab bhī duā detā huuñ

bhūlne vaale tirī ye hī sazā hai ab bhī

zindagī jaañ de ke ik roz manā leñge tujhe

itnā taḌpā ke bhī gar mujh se ḳhafā hai ab bhī

rashk aatā hai mujhe rasm-e-vafā par 'ulfat'

bevafā honā yahāñ shart-e-vafā hai ab bhī

dil ki turbat mein koi dard daba hai ab bhi

aisa lagta hai koi zaKHm hara hai ab bhi

har sitare ko tera nam de ke kah dunga

meri duniya ka faqat ek KHuda hai ab bhi

muntazir hun ki ye jine ki amawas guzre

raat ke sine mein ek chand chhupa hai ab bhi

bin marasim bhi na wo ghair hua mujh se kabhi

main kisi aur ka hun aur wo mera hai ab bhi

apna dushman hi banata hai mohabbat ka junun

sarfaroshi ki wahi ishq-ada hai ab bhi

KHauf ye hai ki judai ke to dukhDe hain hazar

shukr ye hai ki mohabbat mein maza hai ab bhi

yaad kar kar ke tujhe ab bhi dua deta hun

bhulne wale teri ye hi saza hai ab bhi

zindagi jaan de ke ek roz mana lenge tujhe

itna taDpa ke bhi gar mujh se KHafa hai ab bhi

rashk aata hai mujhe rasm-e-wafa par 'ulfat'

bewafa hona yahan shart-e-wafa hai ab bhi