dil ki zarurat lab tak lani paDti hai

dil kī zarūrat lab tak laanī paḌtī hai

lafzoñ se kyoñ baat banānī paḌtī hai

kabhī kabhī kahīñ aag bujhāne kī ḳhātir

na.ī jagah par aag lagānī paḌtī hai

zāhir karne ke liye ḳhufiya dushmanoñ ko

dostoñ meñ afvāh uḌānī paḌtī hai

phal nahīñ detī ḳhāmoshī ḳhāmoshī se

is ke liye āvāz uThānī paḌtī hai

pahle hañsī ḳhud aa jaatī thī hoñToñ tak

ab bahlā phuslā kar laanī paḌtī hai

sūraj sāhab kanjūsī karte haiñ jahāñ

vahāñ par apnī dhuup banānī paḌtī hai

achchhā saudā pahle ḳhud bik jaatā thā

lekin ab āvāz lagānī paḌtī hai

vīrāne mere dar par aa baiThte haiñ

jab bhī kam un kī vīrānī paḌtī hai

sochtā hai har roz bhulāne kā tujh ko

roz hī dil ko muñh kī khānī paḌtī hai

ishq meñ ḳhud ko maar ke yaar ke kūche meñ

apnī mayyat aap uThānī paḌtī hai

dasht-navardī ishq meñ khel hai bachchoñ kā

ham ko apnī gard uḌānī paḌtī hai

andhe shahr ko mutavajjah karne ke liye

dasht meñ jā kar dhuum machānī paḌtī hai

yahāñ kisī ko koī maqām nahīñ detā

apnī jagah 'armān' banānī paḌtī hai

dil ki zarurat lab tak lani paDti hai

lafzon se kyon baat banani paDti hai

kabhi kabhi kahin aag bujhane ki KHatir

nai jagah par aag lagani paDti hai

zahir karne ke liye KHufiya dushmanon ko

doston mein afwah uDani paDti hai

phal nahin deti KHamoshi KHamoshi se

is ke liye aawaz uThani paDti hai

pahle hansi KHud aa jati thi honTon tak

ab bahla phusla kar lani paDti hai

suraj sahab kanjusi karte hain jahan

wahan par apni dhup banani paDti hai

achchha sauda pahle KHud bik jata tha

lekin ab aawaz lagani paDti hai

virane mere dar par aa baiThte hain

jab bhi kam un ki virani paDti hai

sochta hai har roz bhulane ka tujh ko

roz hi dil ko munh ki khani paDti hai

ishq mein KHud ko mar ke yar ke kuche mein

apni mayyat aap uThani paDti hai

dasht-nawardi ishq mein khel hai bachchon ka

hum ko apni gard uDani paDti hai

andhe shahr ko mutawajjah karne ke liye

dasht mein ja kar dhum machani paDti hai

yahan kisi ko koi maqam nahin deta

apni jagah 'arman' banani paDti hai