dil ko dil se ek din aaKHir juda hona hi tha

dil ko dil se ek din āḳhir judā honā hī thā

hai gila kis baat kā un ko ḳhafā honā hī thā

kaun suntā hai yahāñ ḳhāmosh chīḳhoñ kī navā

merī aahoñ ko bhī yūñhī be-sadā honā hī thā

kyā muravvat thī ki saare shahr se uThtī ga.ī

ik tirā ye vasf logoñ meñ ravā honā hī thā

do ghaḌī ham ko milī hai do ghaḌī mohlat kī hai

zindagī kī qaid se āḳhir rihā honā hī thā

dekhtā huuñ jo kiyā tū ne 'adū ke saath bhī

ai nigāh-e-yār tujh se kuchh nayā honā hī thā

chhoḌ kar rāh-e-safar meñ vo to uTh kar chal diye

ek din us bevafā ko bevafā honā hī thā

zaḳhm khaa.e haiñ hamesha 'barham' apnī jaan par

kār-gāh-e-dahr meñ sab se burā honā hī thā

dil ko dil se ek din aaKHir juda hona hi tha

hai gila kis baat ka un ko KHafa hona hi tha

kaun sunta hai yahan KHamosh chiKHon ki nawa

meri aahon ko bhi yunhi be-sada hona hi tha

kya murawwat thi ki sare shahr se uThti gai

ek tera ye wasf logon mein rawa hona hi tha

do ghaDi hum ko mili hai do ghaDi mohlat ki hai

zindagi ki qaid se aaKHir riha hona hi tha

dekhta hun jo kiya tu ne 'adu ke sath bhi

ai nigah-e-yar tujh se kuchh naya hona hi tha

chhoD kar rah-e-safar mein wo to uTh kar chal diye

ek din us bewafa ko bewafa hona hi tha

zaKHm khae hain hamesha 'barham' apni jaan par

kar-gah-e-dahr mein sab se bura hona hi tha