dil ko gham-e-habib se bahla raha hun main

dil ko ġham-e-habīb se bahlā rahā huuñ maiñ

har ġham se be-niyāz huā jā rahā huuñ maiñ

ma.asūmiyat to dekhiye āġhāz-e-shauq kī

un kī navāzishoñ se bhī ghabrā rahā huuñ maiñ

har ġhuncha dil-girafta hai har gul hai sīna-chāk

shāyad bharī bahār ko yaad aa rahā huuñ maiñ

sar-garmī-e-talāsh-e-haqīqat na pūchhiye

manzil se be-niyāz chalā jā rahā huuñ maiñ

rangīnī-e-bahār nazar meñ samā.e kyā

us anjuman se uTh ke chalā aa rahā huuñ maiñ

duniyā mire ḳhulūs kā degī javāb kyā

dushman ke dard par bhī taḌaptā rahā huuñ maiñ

saaqī tire karam kī zarūrat nahīñ mujhe

dil meñ surūr-e-tishna-labī pā rahā huuñ maiñ

vo dil jo mere haal pe royā hai bārhā

us dil se intiqām liye jā rahā huuñ maiñ

kaaTe haiñ din qafas meñ asīrī ke yuuñ 'bahār'

yād-e-chaman meñ zamzama-ārā rahā huuñ maiñ

dil ko gham-e-habib se bahla raha hun main

har gham se be-niyaz hua ja raha hun main

masumiyat to dekhiye aaghaz-e-shauq ki

un ki nawazishon se bhi ghabra raha hun main

har ghuncha dil-girafta hai har gul hai sina-chaak

shayad bhari bahaar ko yaad aa raha hun main

sar-garmi-e-talash-e-haqiqat na puchhiye

manzil se be-niyaz chala ja raha hun main

rangini-e-bahaar nazar mein samae kya

us anjuman se uTh ke chala aa raha hun main

duniya mere KHulus ka degi jawab kya

dushman ke dard par bhi taDapta raha hun main

saqi tere karam ki zarurat nahin mujhe

dil mein surur-e-tishna-labi pa raha hun main

wo dil jo mere haal pe roya hai barha

us dil se intiqam liye ja raha hun main

kaTe hain din qafas mein asiri ke yun 'bahaar'

yaad-e-chaman mein zamzama-ara raha hun main