dil ko karun nisar ki warun jigar ko main

dil ko karūñ nisār ki vārūñ jigar ko maiñ

āñkhoñ meñ duuñ jagah tire tīr-e-nazar ko maiñ

māyūs ho ke baiTh rahūñ umr bhar ko maiñ

yuuñ tuul duuñ ab apne ġham-e-muḳhtasar ko maiñ

ab kyā sunā.ūñ qissa-e-dard-e-jigar ko maiñ

pahchāntā huuñ ḳhuub kisī kī nazar ko maiñ

siine do shām-e-hijr garebān-e-ārzū

dāmān-e-sabr chaak karūñgā sahar ko maiñ

huuñ husn-e-jāñ-sitāñ ke ishāre kā muntazir

tayyār huuñ ba-shauq adam ke safar ko maiñ

aatā hai yaad daur-e-mai-o-jām-e-mai-kada

gardish meñ dekhtā huuñ jo shams-o-qamar ko maiñ

ai jān-e-zār sabr kī koshish fuzūl hai

samjhā huā huuñ hukm-e-qazā-o-qadar ko maiñ

tāsīr hai zabāñ meñ na dil meñ ḳhulūs hai

paidā karūñ kahāñ se duā meñ asar ko maiñ

sau baar ho chukā hai qayāmat kā sāmnā

pahchāntā huuñ ḳhuub tirī rahguzar ko maiñ

TukḌe dil-o-jigar ke haiñ ā.īna-e-nigāh

bhūlā nahīñ huuñ terī ḳhadang-e-nazar ko maiñ

koshish ye hai ki jam.a karūñ ab havās-o-hosh

dāvat jo de chukā huuñ kisī kī nazar ko maiñ

tā-hashr dil ko dil se na milne diyā kabhī

'mas.ūd' kyā kahūñ falak-e-fitna-gar ko maiñ

dil ko karun nisar ki warun jigar ko main

aankhon mein dun jagah tere tir-e-nazar ko main

mayus ho ke baiTh rahun umr bhar ko main

yun tul dun ab apne gham-e-muKHtasar ko main

ab kya sunaun qissa-e-dard-e-jigar ko main

pahchanta hun KHub kisi ki nazar ko main

sine do sham-e-hijr gareban-e-arzu

daman-e-sabr chaak karunga sahar ko main

hun husn-e-jaan-sitan ke ishaare ka muntazir

tayyar hun ba-shauq adam ke safar ko main

aata hai yaad daur-e-mai-o-jam-e-mai-kada

gardish mein dekhta hun jo shams-o-qamar ko main

ai jaan-e-zar sabr ki koshish fuzul hai

samjha hua hun hukm-e-qaza-o-qadar ko main

tasir hai zaban mein na dil mein KHulus hai

paida karun kahan se dua mein asar ko main

sau bar ho chuka hai qayamat ka samna

pahchanta hun KHub teri rahguzar ko main

TukDe dil-o-jigar ke hain aaina-e-nigah

bhula nahin hun teri KHadang-e-nazar ko main

koshish ye hai ki jama karun ab hawas-o-hosh

dawat jo de chuka hun kisi ki nazar ko main

ta-hashr dil ko dil se na milne diya kabhi

'masud' kya kahun falak-e-fitna-gar ko main