dil ko phir ummid garmane lagi

dil ko phir ummīd garmāne lagī

phir mujhe duniyā nazar aane lagī

dil pe Daalī hai kisī ne phir nigāh

saañs phir aane lagī jaane lagī

naqsh phir jamne lagā tadbīr kā

aql phir kuchh dil ko samjhāne lagī

naza.a meñ aane lagī phir kis kī yaad

ārzū-e-zīst taḌpāne lagī

ho chalā hai phir kisī kā intizār

khiñch ke jaan āñkhoñ meñ phir aane lagī

rañj bhī āḳhir ko rāhat ban gayā

shab hujūm-e-ġham se niiñd aane lagī

phir vahī betābi-e-dil hai 'jigar'

phir kisī kī yaad taḌpāne lagī

dil ko phir ummid garmane lagi

phir mujhe duniya nazar aane lagi

dil pe Dali hai kisi ne phir nigah

sans phir aane lagi jaane lagi

naqsh phir jamne laga tadbir ka

aql phir kuchh dil ko samjhane lagi

naza mein aane lagi phir kis ki yaad

aarzu-e-zist taDpane lagi

ho chala hai phir kisi ka intizar

khinch ke jaan aankhon mein phir aane lagi

ranj bhi aaKHir ko rahat ban gaya

shab hujum-e-gham se nind aane lagi

phir wahi betabi-e-dil hai 'jigar'

phir kisi ki yaad taDpane lagi