dil ko sabr-o-qarar bhi na hua

dil ko sabr-o-qarār bhī na huā

jabr par iḳhtiyār bhī na huā

laala har chand baaġh meñ phūlā

gul-ruḳhoñ meñ shumār bhī na huā

mar miTe fikr meñ uruuj ke ham

ḳhaak ūñchā ġhubār bhī na huā

rah gayā tīr-e-yār pahlū meñ

kyā sitam hai ki paar bhī na huā

ḳhuun se mere dāman-e-qātil

taḳhta-e-lāla-zār bhī na huā

mai se mujh ko ḳhumār bhī na huā

nashsha kaisā utaar bhī na huā

asar-e-chashm-e-zār bhī na huā

saaf un kā ġhubār bhī na huā

ek bose ko to ginā sau baar

gāliyoñ kā shumār bhī na huā

un kī rusvā.iyoñ kā paas rahā

maiñ kabhī ashk-bār bhī na huā

sarv ne sar-kashī se kyā paayā

shajar-e-meva-dār bhī na huā

dil ko sabr-o-qarar bhi na hua

jabr par iKHtiyar bhi na hua

lala har chand bagh mein phula

gul-ruKHon mein shumar bhi na hua

mar miTe fikr mein uruj ke hum

KHak uncha ghubar bhi na hua

rah gaya tir-e-yar pahlu mein

kya sitam hai ki par bhi na hua

KHun se mere daman-e-qatil

taKHta-e-lala-zar bhi na hua

mai se mujh ko KHumar bhi na hua

nashsha kaisa utar bhi na hua

asar-e-chashm-e-zar bhi na hua

saf un ka ghubar bhi na hua

ek bose ko to gina sau bar

galiyon ka shumar bhi na hua

un ki ruswaiyon ka pas raha

main kabhi ashk-bar bhi na hua

sarw ne sar-kashi se kya paya

shajar-e-mewa-dar bhi na hua