dil ko taskin ho gai hai samne aane ke baad

dil ko taskīñ ho ga.ī hai sāmne aane ke baad

jaan jā.egī hamārī aap ke jaane ke baad

mujh se dīvāne ko samjhānā usī kā kaam hai

ḳhud samajh jā.egā nāseh mujh ko samjhāne ke baad

tujh se pahle miT chuke haiñ kaise kaise nāmvar

naam terā bhī na legā koī mar jaane ke baad

mehmāñ hote the jab vo dil pe bas rahtā na thā

ek din aane ke pahle ek din jaane ke baad

uTh ga.e bālīñ se tum bīmār kā ye haal thā

aañkh meñ aañsū bhare the hosh meñ aane ke baad

tujh ko ai shaiḳh-e-haram ka.aba mubārak ho tirā

dūsrā ghar ham nahīñ dekheñge mai-ḳhāne ke baad

sharm se gardan jhukā kar chuTkiyāñ lene lagī

shoḳhiyāñ karne lage phir aap sharmāne ke baad

ham kahā karte haiñ un ke kūche meñ har ek se

dafn kar denā yahīñ par ham ko mar jaane ke baad

zulm se apne pashemān āḳhirash honā paḌā

jhuk ga.iiñ un kī nigāheñ laash par aane ke baad

ho ga.e sairāb pī kar ḳhūn-e-dil ai ishq ham

ḳhuub āsūda hue laḳht-e-jigar khāne ke baad

mujh ko marne kā nahīñ ġham ranj hai is baat kā

zulm vo kis par kareñge mere mar jaane ke baad

ishq meñ afsurda ho kar dil kā hotā hai vo rang

phuul kā jo haal ho jaatā hai murjhāne ke baad

sar jhukā kar laash par aa.e haiñ kis andāz se

vo davā karne jo aa.e bhī to mar jaane ke baad

rāste se vo palaT kar aa rahe haiñ kis liye

kyā ḳhayāl aaya unheñ 'naushād' ghar jaane ke baad

dil ko taskin ho gai hai samne aane ke baad

jaan jaegi hamari aap ke jaane ke baad

mujh se diwane ko samjhana usi ka kaam hai

KHud samajh jaega naseh mujh ko samjhane ke baad

tujh se pahle miT chuke hain kaise kaise namwar

nam tera bhi na lega koi mar jaane ke baad

mehman hote the jab wo dil pe bas rahta na tha

ek din aane ke pahle ek din jaane ke baad

uTh gae baalin se tum bimar ka ye haal tha

aankh mein aansu bhare the hosh mein aane ke baad

tujh ko ai shaiKH-e-haram kaba mubarak ho tera

dusra ghar hum nahin dekhenge mai-KHane ke baad

sharm se gardan jhuka kar chuTkiyan lene lagi

shoKHiyan karne lage phir aap sharmane ke baad

hum kaha karte hain un ke kuche mein har ek se

dafn kar dena yahin par hum ko mar jaane ke baad

zulm se apne pasheman aaKHirash hona paDa

jhuk gain un ki nigahen lash par aane ke baad

ho gae sairab pi kar KHun-e-dil ai ishq hum

KHub aasuda hue laKHt-e-jigar khane ke baad

mujh ko marne ka nahin gham ranj hai is baat ka

zulm wo kis par karenge mere mar jaane ke baad

ishq mein afsurda ho kar dil ka hota hai wo rang

phul ka jo haal ho jata hai murjhane ke baad

sar jhuka kar lash par aae hain kis andaz se

wo dawa karne jo aae bhi to mar jaane ke baad

raste se wo palaT kar aa rahe hain kis liye

kya KHayal aaya unhen 'naushad' ghar jaane ke baad