dil ko teri nazar se bachaya na ja saka

dil ko tirī nazar se bachāyā na jā sakā

taqdīr ke likhe ko miTāyā na jā sakā

tum ne hameñ bhulā diyā dil se magar tumheñ

koshish ke bāvajūd bhulāyā na jā sakā

shikva nahīñ tumhārā ki pūchhā na tum ne haal

merī ḳhatā hai mujh se sunāyā na jā sakā

kaifiyyat-e-sharāb-e-mohabbat na pūchhiye

mad.hosh ho ke hosh meñ aaya na jā sakā

tāsīr-e-ishq kahiye ki bechārgī-e-husn

un se mirā ḳhayāl bhulāyā na jā sakā

kuchh dil kī dhaḌkaneñ bhī haiñ āh-o-bukā ke saath

naġhma baġhair saaz ke gaayā na jā sakā

jo bāryāb-e-jalva-gah-e-nāz ho gayā

vo sar kisī ke dar pe jhukāyā na jā sakā

sad-ehtimām-exarz-e-tamannā ke bāvajūd

ik harf bhī zabān pe laayā na jā sakā

'tal.at' junūn-e-ishq meñ ham ne uThā liyā

vo baar jo kisī se uThāyā na jā sakā

dil ko teri nazar se bachaya na ja saka

taqdir ke likhe ko miTaya na ja saka

tum ne hamein bhula diya dil se magar tumhein

koshish ke bawajud bhulaya na ja saka

shikwa nahin tumhaara ki puchha na tum ne haal

meri KHata hai mujh se sunaya na ja saka

kaifiyyat-e-sharab-e-mohabbat na puchhiye

madhosh ho ke hosh mein aaya na ja saka

tasir-e-ishq kahiye ki bechaargi-e-husn

un se mera KHayal bhulaya na ja saka

kuchh dil ki dhaDkanen bhi hain aah-o-buka ke sath

naghma baghair saz ke gaya na ja saka

jo baryab-e-jalwa-gah-e-naz ho gaya

wo sar kisi ke dar pe jhukaya na ja saka

sad-ehtimam-exarz-e-tamanna ke bawajud

ek harf bhi zaban pe laya na ja saka

'talat' junun-e-ishq mein hum ne uTha liya

wo bar jo kisi se uThaya na ja saka