dil ko ujDe hue bite hain zamane kitne

dil ko ujḌe hue biite haiñ zamāne kitne

kilk-e-taqdīr ne luuTe haiñ ḳhazāne kitne

bhuul jaatā huuñ magar sach to yahī hai barsoñ

tum se vābasta rahe ḳhvāb suhāne kitne

dil dukhātī hī rahī gardish-e-ayyām magar

ham bhī masrūf rahe ḳhud bhī na jaane kitne

ek ham aur ye dushnām-tarāzī tauba

apne atrāf rahe ā.ina-ḳhāne kitne

ik nazar dekh liyā thā kisī gul kī jānib

nukta-chīnoñ ne tarāshe haiñ fasāne kitne

gar nahīñ vasl to phir bāda-o-sāġhar hī sahī

dil ne DhūñDe haiñ dhaḌakne ke bahāne kitne

umr-e-rafta ko jo āvāz kabhī dī ham ne

khul ga.e zaḳhm ka.ii, baab purāne kitne

ġhamza-o-ramz meñ 'salmān' tafāvut rakhte

aur ā.eñge tumheñ naaz dikhāne kitne

dil ko ujDe hue bite hain zamane kitne

kilk-e-taqdir ne luTe hain KHazane kitne

bhul jata hun magar sach to yahi hai barson

tum se wabasta rahe KHwab suhane kitne

dil dukhati hi rahi gardish-e-ayyam magar

hum bhi masruf rahe KHud bhi na jaane kitne

ek hum aur ye dushnam-taraazi tauba

apne atraf rahe aaina-KHane kitne

ek nazar dekh liya tha kisi gul ki jaanib

nukta-chinon ne tarashe hain fasane kitne

gar nahin wasl to phir baada-o-saghar hi sahi

dil ne DhunDe hain dhaDakne ke bahane kitne

umr-e-rafta ko jo aawaz kabhi di hum ne

khul gae zaKHm kai, bab purane kitne

ghamza-o-ramz mein 'salman' tafawut rakhte

aur aaenge tumhein naz dikhane kitne