dil ko zar se na toliye sahab

dil ko zar se na toliye sāhab

ham faqīroñ se boliye sāhab

apnā jaisā sabhī ko pā.eñge

dil kā darvāza kholiye sāhab

ab to badleñ ki din badalte haiñ

ahd-e-māzī ko ro liye sāhab

un ke dast-e-hinā.ī kī ḳhātir

haath ḳhuuñ meñ Dubo liye sāhab

jo bhī hañs ke milā mohabbat se

dil se us ke hī ho liye sāhab

in gulāboñ meñ rang bharne ko

ḳhud hī kāñTe chubho liye sāhab

itnā ro.e haiñ ahd-e-māzī ko

dil ke sab daaġh dho liye sāhab

ab to uThiye ki din nikaltā hai

raat bhar ḳhuub so liye sāhab

aap apne mafād kī ḳhātir

biij nafrat ke bo liye sāhab

saarī ḳhushiyāñ haiñ dil meñ 'sailānī'

apne dil ko TaToliye sāhab

dil ko zar se na toliye sahab

hum faqiron se boliye sahab

apna jaisa sabhi ko paenge

dil ka darwaza kholiye sahab

ab to badlen ki din badalte hain

ahd-e-mazi ko ro liye sahab

un ke dast-e-hinai ki KHatir

hath KHun mein Dubo liye sahab

jo bhi hans ke mila mohabbat se

dil se us ke hi ho liye sahab

in gulabon mein rang bharne ko

KHud hi kanTe chubho liye sahab

itna roe hain ahd-e-mazi ko

dil ke sab dagh dho liye sahab

ab to uThiye ki din nikalta hai

raat bhar KHub so liye sahab

aap apne mafad ki KHatir

bij nafrat ke bo liye sahab

sari KHushiyan hain dil mein 'sailani'

apne dil ko TaToliye sahab