dil lagaenge hum us shoKH pari-zad se ab

dil lagā.eñge ham us shoḳh parī-zād se ab

badle sab leveñge charḳh-e-sitam-ījād se ab

tañg ushshāq haiñ zālim tirī bedād se ab

un ke kāñpe hai falak nāla-o-fariyād se ab

barq-o-sīmāb ko da.ave the taḌapne ke baḌe

hoñ muqābil kaho aa kar dil-e-betāb se ab

toḌ de jab kamar-e-shāḳh samar hī us kā

kyā tavaqqo.a rakhe apnī koī aulād se ab

phañs chukī daam meñ sayyād ke jab bulbul-e-zār

ronā kyā fā.eda be-rahmī-e-sayyād se ab

dil liyā jaan bhī maujūd hai lo bismillāh

mujh ko chāra nahīñ hai aap ke irshād se ab

'aish' āsūdgī dārain kī ho tujh ko nasīb

hai duā ye hī mirī ḳhāliq-e-javvād se ab

dil lagaenge hum us shoKH pari-zad se ab

badle sab lewenge charKH-e-sitam-ijad se ab

tang ushshaq hain zalim teri bedad se ab

un ke kanpe hai falak nala-o-fariyaad se ab

barq-o-simab ko dawe the taDapne ke baDe

hon muqabil kaho aa kar dil-e-betab se ab

toD de jab kamar-e-shaKH samar hi us ka

kya tawaqqoa rakhe apni koi aulad se ab

phans chuki dam mein sayyaad ke jab bulbul-e-zar

rona kya faeda be-rahmi-e-sayyaad se ab

dil liya jaan bhi maujud hai lo bismillah

mujh ko chaara nahin hai aap ke irshad se ab

'aish' aasudgi darain ki ho tujh ko nasib

hai dua ye hi meri KHaliq-e-jawwad se ab