dil le ke hamara jo koi talib-e-jaan hai

dil le ke hamārā jo koī tālib-e-jāñ hai

ham bhī ye samajhte haiñ ki jī hai to jahāñ hai

har ek ke dukh-dard kā ab zikr-o-bayāñ hai

mujh ko bhī ho ruḳhsat mire bhī muñh meñ zabāñ hai

is ishq ke hai tū hī sazā-vār ki har ek

dil de ke tire naam ko jūyā-e-nishāñ hai

jūinda-e-har-chīz hai yābinda jahāñ meñ

juz umr-e-guzishta ki vo DhūñDo to kahāñ hai

piirī jo tū jaave to javānī se ye kahnā

ḳhush rahiyo marī jaan tū jīdhar hai jahāñ hai

pahuñchā na koī murġh kabhū apne chaman tak

juz tā.ir-e-hasrat ki vo yaañ bāl-fishāñ hai

tujh se to kisū tarah mirā kuchh nahīñ chaltā

juz ḳhuun ki āñkhoñ se shab o roz ravāñ hai

saaqī tū nazar kījiyo Tuk sub.h-e-chaman ko

is piir ke jalve kā bhalā koī javāñ hai

'saudā' kā tire dasht meñ tiflāñ se hai ye haal

jīdhar vo khaḌā hove to juuñ sañg-e-nishāñ hai

dil le ke hamara jo koi talib-e-jaan hai

hum bhi ye samajhte hain ki ji hai to jahan hai

har ek ke dukh-dard ka ab zikr-o-bayan hai

mujh ko bhi ho ruKHsat mere bhi munh mein zaban hai

is ishq ke hai tu hi saza-war ki har ek

dil de ke tere nam ko juya-e-nishan hai

juinda-e-har-chiz hai yabinda jahan mein

juz umr-e-guzishta ki wo DhunDo to kahan hai

piri jo tu jawe to jawani se ye kahna

KHush rahiyo mari jaan tu jidhar hai jahan hai

pahuncha na koi murgh kabhu apne chaman tak

juz tair-e-hasrat ki wo yan baal-fishan hai

tujh se to kisu tarah mera kuchh nahin chalta

juz KHun ki aankhon se shab o roz rawan hai

saqi tu nazar kijiyo Tuk subh-e-chaman ko

is pir ke jalwe ka bhala koi jawan hai

'sauda' ka tere dasht mein tiflan se hai ye haal

jidhar wo khaDa howe to jun sang-e-nishan hai