dil mahw-e-intizar kabhi hai kabhi nahin

dil mahv-e-intizār kabhī hai kabhī nahīñ

sochoñ kā ik hisār kabhī hai kabhī nahīñ

ḳhushiyoñ kī justujū meñ huā aisā bārhā

sar par ġhamoñ kā baar kabhī hai kabhī nahīñ

nashsha tire ḳhulūs kā ik bahr-e-be-karāñ

halkā sā vo ḳhumār kabhī hai kabhī nahīñ

jis pe guloñ ke husn kā dār-o-madār hai

gulshan meñ vo bahār kabhī hai kabhī nahīñ

ġhārat hue haiñ jis ke sabab ahl-e-gulsitāñ

jalvoñ pe vo nikhār kabhī hai kabhī nahīñ

rāh-e-vafā meñ hāl-e-dil-e-zār kī na pūchh

ḳhud par bhī iḳhtiyār kabhī hai kabhī nahīñ

ik kashmakash meñ āj-kal uljhī hai zindagī

vo rang-e-e'tibār kabhī hai kabhī nahīñ

aate haiñ zindagī meñ ka.ī aise daur bhī

maslak meñ inkisār kabhī hai kabhī nahīñ

fihrist-e-jāñ-nisārāñ meñ ḳhush-baḳht aur haiñ

'sā.ir' kā to shumār kabhī hai kabhī nahīñ

dil mahw-e-intizar kabhi hai kabhi nahin

sochon ka ek hisar kabhi hai kabhi nahin

KHushiyon ki justuju mein hua aisa barha

sar par ghamon ka bar kabhi hai kabhi nahin

nashsha tere KHulus ka ek bahr-e-be-karan

halka sa wo KHumar kabhi hai kabhi nahin

jis pe gulon ke husn ka dar-o-madar hai

gulshan mein wo bahaar kabhi hai kabhi nahin

ghaarat hue hain jis ke sabab ahl-e-gulsitan

jalwon pe wo nikhaar kabhi hai kabhi nahin

rah-e-wafa mein haal-e-dil-e-zar ki na puchh

KHud par bhi iKHtiyar kabhi hai kabhi nahin

ek kashmakash mein aaj-kal uljhi hai zindagi

wo rang-e-e'tibar kabhi hai kabhi nahin

aate hain zindagi mein kai aise daur bhi

maslak mein inkisar kabhi hai kabhi nahin

fihrist-e-jaan-nisaran mein KHush-baKHt aur hain

'sair' ka to shumar kabhi hai kabhi nahin