dil mein aahaT si ho rahi hai abhi

dil meñ aahaT sī ho rahī hai abhī

koī chaukhaT pukārtī hai abhī

mujh se koī savāl mat pūchho

kaifiyat dil kī dūsrī hai abhī

raat hotī hai aao lauT chaleñ

ye ufuq thoḌī surma.ī hai abhī

chāñdnī shab meñ kyā hai kaam tirā

raat jugnū se pūchhtī hai abhī

tum bhī kyā maut is ko samjhe ho

ruuh kapḌe badal rahī hai abhī

ik sahāre kī bhī umiid na rakh

bhuuk rishte nigal rahī hai abhī

phir ye mauqa' na haath aa.egā

zindagī hai to bandagī hai abhī

tere kāñdhe pe jo mirā sar hai

mujh ko kis baat kī kamī hai abhī

raat kohre ne aise zaḳhm diye

dhuup āñgan meñ ro rahī hai abhī

dekheñ kirneñ kahāñ utartī haiñ

duur ik tez raushnī hai abhī

is bayābān-e-shahr-e-zīst meñ hī

ek aur shab guzārnī hai abhī

dil mein aahaT si ho rahi hai abhi

koi chaukhaT pukarti hai abhi

mujh se koi sawal mat puchho

kaifiyat dil ki dusri hai abhi

raat hoti hai aao lauT chalen

ye ufuq thoDi surmai hai abhi

chandni shab mein kya hai kaam tera

raat jugnu se puchhti hai abhi

tum bhi kya maut is ko samjhe ho

ruh kapDe badal rahi hai abhi

ek sahaare ki bhi umid na rakh

bhuk rishte nigal rahi hai abhi

phir ye mauqa' na hath aaega

zindagi hai to bandagi hai abhi

tere kandhe pe jo mera sar hai

mujh ko kis baat ki kami hai abhi

raat kohre ne aise zaKHm diye

dhup aangan mein ro rahi hai abhi

dekhen kirnen kahan utarti hain

dur ek tez raushni hai abhi

is bayaban-e-shahr-e-zist mein hi

ek aur shab guzarni hai abhi