dil mein chamke hue hain dagh bahut

dil meñ chamke hue haiñ daaġh bahut

raushan is ghar meñ haiñ charāġh bahut

maiñ na ro.uuñ to kyā karūñ saaqī

bhar ke detā nahīñ ayāġh bahut

shab ko va.ada hai un ke aane kā

kyoñ na raushan karūñ charāġh bahut

dil-e-vīrāñ ko dekh kar bole

gaañv hote haiñ be-charāġh bahut

ġhair ko sar chaḌhā.eñ vo tauba

sadqe kar Daale aise zan bahut

dil-e-pur-dāġh hī kī sair karo

hai tumhāre liye ye baaġh bahut

mujh se milte haiñ jab ye kahte haiñ

aap ko ho gayā dimāġh bahut

ġham se paa.ī najāt marqad meñ

mar ke hāsil huā farāġh bahut

naqsh-e-pā tak milā na un kā kahīñ

chhān maarā hai koh-o-rāġh bahut

kuchh to farmā.iye janāb-e-‘ranj’

aaj haiñ aap baaġh baaġh bahut

dil mein chamke hue hain dagh bahut

raushan is ghar mein hain charagh bahut

main na roun to kya karun saqi

bhar ke deta nahin ayagh bahut

shab ko wada hai un ke aane ka

kyon na raushan karun charagh bahut

dil-e-viran ko dekh kar bole

ganw hote hain be-charagh bahut

ghair ko sar chaDhaen wo tauba

sadqe kar Dale aise zan bahut

dil-e-pur-dagh hi ki sair karo

hai tumhaare liye ye bagh bahut

mujh se milte hain jab ye kahte hain

aap ko ho gaya dimagh bahut

gham se pai najat marqad mein

mar ke hasil hua faragh bahut

naqsh-e-pa tak mila na un ka kahin

chhan mara hai koh-o-ragh bahut

kuchh to farmaiye janab-e-‘ranj’

aaj hain aap bagh bagh bahut