dil mein har-waqt KHayal-e-dar-e-jaanana hai

dil meñ har-vaqt ḳhayāl-e-dar-e-jānāna hai

ya.anī ka.abe ke muqaddar meñ sanam-ḳhāna hai

zauq-e-rangīñ mirā ā.īna-e-mai-ḳhāna hai

mai hai shabnam mirī aur gul mirā paimāna hai

hai vahī dil jo kisī sho.ale kā muhtāj nahīñ

apnī hī aag meñ jal jaa.e vo parvāna hai

dil meñ armānoñ ke sūkhe hue kuchh phuul sahī

koī ye to na kahegā ki ye vīrāna hai

ab ye aalam hai mirī tishna-labī kā saaqī

ashk āñkhoñ meñ haiñ aur haath meñ paimāna hai

vo kahīñ jalva-numā ho to qayāmat ho jaa.e

saarā aalam jise be-dekhe hī dīvāna hai

laġhzishoñ kā mirī ab to hai ye aalam ai 'shauq'

kāñpte hāthoñ meñ TuuTā huā paimāna hai

dil mein har-waqt KHayal-e-dar-e-jaanana hai

yani kabe ke muqaddar mein sanam-KHana hai

zauq-e-rangin mera aaina-e-mai-KHana hai

mai hai shabnam meri aur gul mera paimana hai

hai wahi dil jo kisi shoale ka muhtaj nahin

apni hi aag mein jal jae wo parwana hai

dil mein armanon ke sukhe hue kuchh phul sahi

koi ye to na kahega ki ye virana hai

ab ye aalam hai meri tishna-labi ka saqi

ashk aankhon mein hain aur hath mein paimana hai

wo kahin jalwa-numa ho to qayamat ho jae

sara aalam jise be-dekhe hi diwana hai

laghzishon ka meri ab to hai ye aalam ai 'shauq'

kanpte hathon mein TuTa hua paimana hai