dil mein ho dard-e-ishq labon par fughan na ho

dil meñ ho dard-e-ishq laboñ par fuġhāñ na ho

mumkin nahīñ ki aag lage aur dhuāñ na ho

ġhairat ye chāhtī hai ki is raah par chalo

jis raah meñ kisī ke qadam kā nishāñ na ho

manzil kī justujū hai to ai rahravān-e-ishq

tanhā-ravī ho pairavī-e-kārvāñ na ho

ham gardish-e-falak se kahāñ bach ke jā.eñge

vo kaun sī zamīñ hai jahāñ āsmāñ na ho

tere sitam kī ḳhair bas itnā rahe ḳhayāl

vo ġham na baḳhshnā jo ġham-e-jāvedāñ na ho

hifz-e-ḳhudī kī baat hai āñkheñ jo nam nahīñ

aisā nahīñ ki mujh ko ġham-e-āshiyāñ na ho

iz.hār-e-haq pe kis liye ḳhāmosh ho ga.e

'raunaq' zabān rakhte hue be-zabāñ na ho

dil mein ho dard-e-ishq labon par fughan na ho

mumkin nahin ki aag lage aur dhuan na ho

ghairat ye chahti hai ki is rah par chalo

jis rah mein kisi ke qadam ka nishan na ho

manzil ki justuju hai to ai rahrawan-e-ishq

tanha-rawi ho pairawi-e-karwan na ho

hum gardish-e-falak se kahan bach ke jaenge

wo kaun si zamin hai jahan aasman na ho

tere sitam ki KHair bas itna rahe KHayal

wo gham na baKHshna jo gham-e-jawedan na ho

hifz-e-KHudi ki baat hai aankhen jo nam nahin

aisa nahin ki mujh ko gham-e-ashiyan na ho

izhaar-e-haq pe kis liye KHamosh ho gae

'raunaq' zaban rakhte hue be-zaban na ho