dil mein ek shor uThate hain chale jate hain

dil meñ ik shor uThāte haiñ chale jaate haiñ

aap jazbāt jagāte haiñ chale jaate haiñ

roz jaltā hai sar-e-shām umīdoñ kā charāġh

dāman-e-lail bujhāte haiñ chale jaate haiñ

vaqt-e-ruḳhsat to qayāmat kā samāñ hotā hai

ġham ko siine se lagāte haiñ chale jaate haiñ

ham to phirte haiñ mohabbat kā ḳhazāna le kar

raah nafrat meñ luTāte haiñ chale jaate haiñ

chand lamhoñ kī rifāqat meñ ka.ī ḳhvāb hasīñ

lāla-o-gul ko dikhāte haiñ chale jaate haiñ

ḳhushk hoñToñ ko mire jhūTā tabassum de kar

phir se āñkhoñ ko rulāte haiñ chale jaate haiñ

kaun kartā hai adā haqq-e-marāsim 'shamsī'

log bas rasm nibhāte haiñ chale jaate haiñ

dil mein ek shor uThate hain chale jate hain

aap jazbaat jagate hain chale jate hain

roz jalta hai sar-e-sham umidon ka charagh

daman-e-lail bujhate hain chale jate hain

waqt-e-ruKHsat to qayamat ka saman hota hai

gham ko sine se lagate hain chale jate hain

hum to phirte hain mohabbat ka KHazana le kar

rah nafrat mein luTate hain chale jate hain

chand lamhon ki rifaqat mein kai KHwab hasin

lala-o-gul ko dikhate hain chale jate hain

KHushk honTon ko mere jhuTa tabassum de kar

phir se aankhon ko rulate hain chale jate hain

kaun karta hai ada haqq-e-marasim 'shamsi'

log bas rasm nibhate hain chale jate hain