dil mein jab be-KHudi si rahti hai

dil meñ jab be-ḳhudī sī rahtī hai

har taraf tīrgī sī rahtī hai

aañkh meñ ik namī sī rahtī hai

kyoñ adhūrī ḳhushī sī rahtī hai

mutma.in huuñ magar na jaane kyoñ

ziist meñ kuchh kamī sī rahtī hai

mauj-e-dariyā kī in sadāoñ meñ

kis qadar tishnagī sī rahtī hai

jab tasavvur meñ koī aatā hai

der tak raushnī sī rahtī hai

dekhnā us mahal kī khiḌkī meñ

ek laḌkī khaḌī sī rahtī hai

dekh kar us ko dil kī dil jaane

'aql bhī sochtī sī rahtī hai

tum na aaoge jāntī huuñ magar

aas dil meñ lagī sī rahtī hai

dekh kar nafratoñ kī duniyā ko

ye azal ab Darī sī rahtī hai

dil mein jab be-KHudi si rahti hai

har taraf tirgi si rahti hai

aankh mein ek nami si rahti hai

kyon adhuri KHushi si rahti hai

mutmain hun magar na jaane kyon

zist mein kuchh kami si rahti hai

mauj-e-dariya ki in sadaon mein

kis qadar tishnagi si rahti hai

jab tasawwur mein koi aata hai

der tak raushni si rahti hai

dekhna us mahal ki khiDki mein

ek laDki khaDi si rahti hai

dekh kar us ko dil ki dil jaane

'aql bhi sochti si rahti hai

tum na aaoge jaanti hun magar

aas dil mein lagi si rahti hai

dekh kar nafraton ki duniya ko

ye azal ab Dari si rahti hai