dil mein jagah dun tumko apne pahle se hain mehman bahut

dil meñ jagah duuñ tum ko apne pahle se haiñ mehmān bahut

tum dekho koī aur Thikāna ho jāoge pareshān bahut

us ko bhulāne kī koshish maiñ jitnī kartā huuñ yaaro

us kī yaad ke siine meñ mire chubhte haiñ paikān bahut

kaun jiye ab jaañ ko jalā kar rahne do mar jaate haiñ

ishq meñ mar jaanā hī ham ko lagtā hai āsān bahut

us se milā to dekhā maiñ ne thā ḳhud se begāna vo

us se milne kā thā mujh ko jaane kyoñ armān bahut

tere dil ko apnī yādoñ se rakkhā ābād magar

kar baiThe ham apne dil ko ḳhud hī ab vīrān bahut

kāġhaz ke phūloñ se apne ghar ko mahkānā chāhā

is ḳhvāhish meñ maiñ ne badle roz na.e gul-dān bahut

naaz thā mujh ko apne dil par rusvā na hone degā ye

yuuñ sarkā pahlū se mere rakkhā dil kā dhyān bahut

ab to tumheñ ham bhuul ga.e haiñ kyoñ aatī ho yaad hameñ

yaad kiyā karte the tum ko jab ham the pareshān bahut

tum ḳhushiyoñ meñ Duube hue the ġham kī sadā.eñ kyoñ sunte

tum ko pukārā dard meñ apne jab ham the be-jān bahut

ab dekho 'irshād' yahī sachchā.ī hai dil vāloñ kī

ishq jo dil se karte haiñ vo rahte haiñ pareshān bahut

dil mein jagah dun tum ko apne pahle se hain mehman bahut

tum dekho koi aur Thikana ho jaoge pareshan bahut

us ko bhulane ki koshish main jitni karta hun yaro

us ki yaad ke sine mein mere chubhte hain paikan bahut

kaun jiye ab jaan ko jala kar rahne do mar jate hain

ishq mein mar jaana hi hum ko lagta hai aasan bahut

us se mila to dekha main ne tha KHud se begana wo

us se milne ka tha mujh ko jaane kyon arman bahut

tere dil ko apni yaadon se rakkha aabaad magar

kar baiThe hum apne dil ko KHud hi ab viran bahut

kaghaz ke phulon se apne ghar ko mahkana chaha

is KHwahish mein main ne badle roz nae gul-dan bahut

naz tha mujh ko apne dil par ruswa na hone dega ye

yun sarka pahlu se mere rakkha dil ka dhyan bahut

ab to tumhein hum bhul gae hain kyon aati ho yaad hamein

yaad kiya karte the tum ko jab hum the pareshan bahut

tum KHushiyon mein Dube hue the gham ki sadaen kyon sunte

tum ko pukara dard mein apne jab hum the be-jaan bahut

ab dekho 'irshad' yahi sachchai hai dil walon ki

ishq jo dil se karte hain wo rahte hain pareshan bahut