dil mein jhanka to bahut zaKHm purane nikle

dil meñ jhāñkā to bahut zaḳhm purāne nikle

ik fasāne se ka.ī aur fasāne nikle

ḳhvāb to ḳhvāb the āñkhoñ meñ kahāñ ruk jaate

vo dabe paañv unheñ bhī to churāne nikle

dekhnā ye hai Thahartā hai kahāñ josh-e-junūñ

sar-phire shahr-e-nigārāñ ko jalāne nikle

apne ghar sañg-e-malāmat kī huī hai bārish

be-gunāhī kī sanad ham jo dikhāne nikle

kārobār-e-rasan-o-dār kī tash.hīr huī

sarfaroshī ke yahāñ kitne bahāne nikle

jin kitāboñ pe salīqe se jamī vaqt kī gard

un kitāboñ hī meñ yādoñ ke ḳhazāne nikle

vo sitam-kesh bahar-hāl sitam-kesh rahe

dard soyā bhī nahīñ thā ki jagāne nikle

har taraf shahr meñ vīrānī kā 'ālam hai 'razā'

zindagī kaun kahāñ tujh ko sajāne nikle

dil mein jhanka to bahut zaKHm purane nikle

ek fasane se kai aur fasane nikle

KHwab to KHwab the aankhon mein kahan ruk jate

wo dabe panw unhen bhi to churane nikle

dekhna ye hai Thaharta hai kahan josh-e-junun

sar-phire shahr-e-nigaran ko jalane nikle

apne ghar sang-e-malamat ki hui hai barish

be-gunahi ki sanad hum jo dikhane nikle

karobar-e-rasan-o-dar ki tashhir hui

sarfaroshi ke yahan kitne bahane nikle

jin kitabon pe saliqe se jami waqt ki gard

un kitabon hi mein yaadon ke KHazane nikle

wo sitam-kesh bahar-haal sitam-kesh rahe

dard soya bhi nahin tha ki jagane nikle

har taraf shahr mein virani ka 'alam hai 'raza'

zindagi kaun kahan tujh ko sajaane nikle