dil mein jinhen utarte dil se wahi utar gae

dil meñ jinheñ utārte dil se vahī utar ga.e

jism ko chūmte rahe ruuh pe vaar kar ga.e

phir sar-e-shāḳh-e-ārzū khil ke mahak uThī kalī

dard kī fasl ho chukī daaġh ke din guzar ga.e

saare malāmatoñ ke tiir jin kā hadaf bane the ham

apne liye vo tiir bhī kaam duā kā kar ga.e

aaj to terī yaad bhī marham-e-dil na ho sakī

zaḳhm zarūr dab ga.e daaġh magar ubhar ga.e

dasht-e-tavahhumāt meñ apnī sadā hai aur ham

husn-e-yaqīñ ke qāfile kis se kaheñ kidhar ga.e

vaqt ke qāfile meñ jab koī na ham-safar milā

ban ke ġhubār-e-rahguzar dasht meñ ham bikhar ga.e

dil mein jinhen utarte dil se wahi utar gae

jism ko chumte rahe ruh pe war kar gae

phir sar-e-shaKH-e-arzu khil ke mahak uThi kali

dard ki fasl ho chuki dagh ke din guzar gae

sare malamaton ke tir jin ka hadaf bane the hum

apne liye wo tir bhi kaam dua ka kar gae

aaj to teri yaad bhi marham-e-dil na ho saki

zaKHm zarur dab gae dagh magar ubhar gae

dasht-e-tawahhumat mein apni sada hai aur hum

husn-e-yaqin ke qafile kis se kahen kidhar gae

waqt ke qafile mein jab koi na ham-safar mila

ban ke ghubar-e-rahguzar dasht mein hum bikhar gae