dil mein jo ishq ishq hai shosha hai aql ka

dil meñ jo ishq ishq hai shosha hai aql kā

terī javānī dil kī buḌhāpā hai aql kā

dekho ki dil-pazīr hai parkho hai dil-shanās

vahshat junūñ ke biich meñ parda hai aql kā

roko ise batāo sahī rāsta ki dil

dil kā to Thīk-Thāk hai kachchā hai aql kā

afsos ḳhud ko daav meñ hāregā bad-qimār

nahle pe tere dil ke ye dahlā hai aql kā

majnūñ hai tujh meñ rahte haiñ jinnāt yaas ke

hāsil pe kuchh nahīñ hai to lailā hai aql kā

āñkhoñ ko lag rahā hai ummīdoñ kā pārijāt

paanī kā ek sahrā hai dhoka hai aql kā

tū phir kahāñ thā ain mohabbat ke vaqt dost

pahlā hī harf ain kā hijā hai aql kā

dil mein jo ishq ishq hai shosha hai aql ka

teri jawani dil ki buDhapa hai aql ka

dekho ki dil-pazir hai parkho hai dil-shanas

wahshat junun ke bich mein parda hai aql ka

roko ise batao sahi rasta ki dil

dil ka to Thik-Thak hai kachcha hai aql ka

afsos KHud ko daw mein haarega bad-qimar

nahle pe tere dil ke ye dahla hai aql ka

majnun hai tujh mein rahte hain jinnat yas ke

hasil pe kuchh nahin hai to laila hai aql ka

aankhon ko lag raha hai ummidon ka parijat

pani ka ek sahra hai dhoka hai aql ka

tu phir kahan tha ain mohabbat ke waqt dost

pahla hi harf ain ka hija hai aql ka