dil mein jo machalti hai sada aur hi kuchh hai

dil meñ jo machaltī hai sadā aur hī kuchh hai

hoñToñ ko jo chhūtī hai du'ā aur hī kuchh hai

ummīd hai kuchh aur 'atā aur hī kuchh hai

lagtā hai ki manzūr-e-ḳhudā aur hī kuchh hai

pahle sī ab is dil se sadā.eñ nahīñ ātīñ

ab aah nikalne kī adā aur hī kuchh hai

is baar charāġhoñ kī havāoñ se nibhegī

is baar havāoñ kī razā aur hī kuchh hai

ḳhushbū jo huī gul se judā us pe khulā ye

har samt bikharne kā maza aur hī kuchh hai

aġhyār kā har tarz-e-sitam ḳhuub hai lekin

ahbāb kā andāz-e-jafā aur hī kuchh hai

tum ko ye hasīñ phuul hasīñ ḳhvāb mubārak

ham ko to mohabbat ne diyā aur hī kuchh hai

yuuñ hai ki tabassum ne rakhī laaj hai sab kī

varna to har ik dil meñ chhupā aur hī kuchh hai

dil mein jo machalti hai sada aur hi kuchh hai

honTon ko jo chhuti hai du'a aur hi kuchh hai

ummid hai kuchh aur 'ata aur hi kuchh hai

lagta hai ki manzur-e-KHuda aur hi kuchh hai

pahle si ab is dil se sadaen nahin aatin

ab aah nikalne ki ada aur hi kuchh hai

is bar charaghon ki hawaon se nibhegi

is bar hawaon ki raza aur hi kuchh hai

KHushbu jo hui gul se juda us pe khula ye

har samt bikharne ka maza aur hi kuchh hai

aghyar ka har tarz-e-sitam KHub hai lekin

ahbab ka andaz-e-jafa aur hi kuchh hai

tum ko ye hasin phul hasin KHwab mubarak

hum ko to mohabbat ne diya aur hi kuchh hai

yun hai ki tabassum ne rakhi laj hai sab ki

warna to har ek dil mein chhupa aur hi kuchh hai