dil mein jo ranj-o-alam dard-e-nihan milte hain

dil meñ jo ranj-o-alam dard-e-nihāñ milte haiñ

shab kī tanhā.ī meñ aksar vo 'ayāñ milte haiñ

Tuut ke palkoñ se dāman meñ samā jaate haiñ

ab bhī kuchh ḳhvāb tah-e-ashk-e-ravāñ milte haiñ

apne dāman ke maiñ kāñToñ ko liye jā.ūñ kahāñ

sirf phūloñ ke ḳharīdār yahāñ milte haiñ

is se sābit hai ki is raah se guzre haiñ bahut

kūcha-e-dil meñ jo qadmoñ ke nishāñ milte haiñ

dafn ho jaate haiñ maazī kī zamīnoñ meñ zarūr

par vo ahbāb sadā zer-e-zabāñ milte haiñ

is jahāñ se pare ik aur jahāñ hai ai dost

jo nahīñ milte yahāñ log vahāñ milte haiñ

ham yaqīñ kis pe kareñ kis ko haqīqat māneñ

had-e-imkāñ se pare vahm-o-gumāñ milte haiñ

sidq-o-iḳhlās vafā mehr-o-mohabbat 'usmān'

is zamāne meñ ye asbāb kahāñ milte haiñ

dil mein jo ranj-o-alam dard-e-nihan milte hain

shab ki tanhai mein aksar wo 'ayan milte hain

Tut ke palkon se daman mein sama jate hain

ab bhi kuchh KHwab tah-e-ashk-e-rawan milte hain

apne daman ke main kanTon ko liye jaun kahan

sirf phulon ke KHaridar yahan milte hain

is se sabit hai ki is rah se guzre hain bahut

kucha-e-dil mein jo qadmon ke nishan milte hain

dafn ho jate hain mazi ki zaminon mein zarur

par wo ahbab sada zer-e-zaban milte hain

is jahan se pare ek aur jahan hai ai dost

jo nahin milte yahan log wahan milte hain

hum yaqin kis pe karen kis ko haqiqat manen

had-e-imkan se pare wahm-o-guman milte hain

sidq-o-iKHlas wafa mehr-o-mohabbat 'usman'

is zamane mein ye asbab kahan milte hain