dil mein kisi KHalish ka guzar chahta hun main

dil meñ kisī ḳhalish kā guzar chāhtā huuñ maiñ

jaisī bhī ho bas ek nazar chāhtā huuñ maiñ

ḳham ho ke phir na uTThe vo sar chāhtā huuñ maiñ

uTh kar jo ḳham na ho vo nazar chāhtā huuñ maiñ

hote hī tazkira koī aa jaa.e rū-ba-rū

itnā buland zauq-e-nazar chāhtā huuñ maiñ

merā sukūn shauq hai sab kuchh mire liye

nāloñ ko be-niyāz asar chāhtā huuñ maiñ

kyā pūchhte ho maqsad-e-iz.hār-e-ārzū

sharh-e-vafā pe naqd-o-nazar chāhtā huuñ maiñ

paiham ġham-e-firāq se ghabrā gayā hai dil

kuchh imtiyāz-e-shām-o-sahar chāhtā huuñ maiñ

jī chāhtā hai aag lagā duuñ naqāb meñ

jalvoñ se intiqām-e-nazar chāhtā huuñ maiñ

muhtāj-e-rāhbar huuñ jahāñ ḳhizr tak 'shakīl'

aisī bhī koī rāhguzar chāhtā huuñ maiñ

dil mein kisi KHalish ka guzar chahta hun main

jaisi bhi ho bas ek nazar chahta hun main

KHam ho ke phir na uTThe wo sar chahta hun main

uTh kar jo KHam na ho wo nazar chahta hun main

hote hi tazkira koi aa jae ru-ba-ru

itna buland zauq-e-nazar chahta hun main

mera sukun shauq hai sab kuchh mere liye

nalon ko be-niyaz asar chahta hun main

kya puchhte ho maqsad-e-izhaar-e-arzu

sharh-e-wafa pe naqd-o-nazar chahta hun main

paiham gham-e-firaq se ghabra gaya hai dil

kuchh imtiyaz-e-sham-o-sahar chahta hun main

ji chahta hai aag laga dun naqab mein

jalwon se intiqam-e-nazar chahta hun main

muhtaj-e-rahbar hun jahan KHizr tak 'shakil'

aisi bhi koi rahguzar chahta hun main