dil mein kisi ki yaad hai kaif-e-shabab ki tarah

dil meñ kisī kī yaad hai kaif-e-shabāb kī tarah

ḳhuun ragoñ meñ hai ravāñ mauj-e-sharāb kī tarah

go haiñ mizāj muḳhtalif go haiñ shi'ār muḳhtalif

ek haiñ phir bhī husn-o-'ishq barq-o-sahāb kī tarah

tere karam kā silsila ḳhizr kī 'umr se darāz

merī hayāt-e-muḳhtasar naqsh-e-bar-āb kī tarah

hasrat-e-dīd kī ḳhalish kam nahīñ lutf-e-dīd se

yād-e-shabāb hai hasīñ 'ahd-e-shabāb kī tarah

terī bahār-e-husn par husn-e-bahār bhī nisār

jhuum rahī hai har nazar shāḳh-e-gulāb kī tarah

dekhiye to kuchh aur hai sochiye to kuchh aur hai

jalva-e-kā.enāt hai mauj-e-sarāb kī tarah

farq hai ik nigāh kā vahm hai ik ḳhayāl kā

'ishq-o-havas meñ varna ek 'aib-o-savāb kī tarah

zarb-e-ġham-e-hayāt se shīsha-e-qalb TuuT kar

juḌ na sakegā phir kabhī jām-e-sharāb kī tarah

shām-e-firāq-e-dost bhī kam nahīñ roz-e-hashr se

dil se qarār uḌ gayā aañkh se ḳhvāb kī tarah

dil mein kisi ki yaad hai kaif-e-shabab ki tarah

KHun ragon mein hai rawan mauj-e-sharab ki tarah

go hain mizaj muKHtalif go hain shi'ar muKHtalif

ek hain phir bhi husn-o-'ishq barq-o-sahab ki tarah

tere karam ka silsila KHizr ki 'umr se daraaz

meri hayat-e-muKHtasar naqsh-e-bar-ab ki tarah

hasrat-e-did ki KHalish kam nahin lutf-e-did se

yaad-e-shabab hai hasin 'ahd-e-shabab ki tarah

teri bahaar-e-husn par husn-e-bahaar bhi nisar

jhum rahi hai har nazar shaKH-e-gulab ki tarah

dekhiye to kuchh aur hai sochiye to kuchh aur hai

jalwa-e-kaenat hai mauj-e-sarab ki tarah

farq hai ek nigah ka wahm hai ek KHayal ka

'ishq-o-hawas mein warna ek 'aib-o-sawab ki tarah

zarb-e-gham-e-hayat se shisha-e-qalb TuT kar

juD na sakega phir kabhi jam-e-sharab ki tarah

sham-e-firaq-e-dost bhi kam nahin roz-e-hashr se

dil se qarar uD gaya aankh se KHwab ki tarah