dil mein mere har ghaDi dariya-e-gham labrez hai

dil meñ mere har ghaḌī dariyā-e-ġham labrez hai

baat jo muñh se nikaltī hai vo dard-āmez hai

zabt kartā huuñ to baḌhtā hai mirā soz-e-darūñ

ashk se bhī apne Dartā huuñ ki tūfāñ-ḳhez hai

pahle in āñkhoñ se sail-e-ashk hotā thā ravāñ

ab vufūr-e-ġham se merī chashm-e-tar ḳhūñ-rez hai

aarzū tak ho ga.ī dil ke liye bār-e-garāñ

nā-tavānī ke sabab armāñ bhī hasrat-ḳhez hai

hai abas sāmān-e-farhat ġham-zada dil ke liye

mere lab ko ḳhud tabassum se baḌā parhez hai

din ga.e tafrīh ke jab se huā dil ġham-kada

kyā ġharaz ham ko agar duniyā tarab-añgez hai

is zamīñ par kar rahā hai tai masāfat har-nafas

vo mubārak hai qadam jis kā safar meñ tez hai

qalb-e-'hāfiz' tā-dam-e-āḳhir na pā.egā sukūñ

jumla-sāmān-e-tarab-angez vahshat-ḳhez hai

dil mein mere har ghaDi dariya-e-gham labrez hai

baat jo munh se nikalti hai wo dard-amez hai

zabt karta hun to baDhta hai mera soz-e-darun

ashk se bhi apne Darta hun ki tufan-KHez hai

pahle in aankhon se sail-e-ashk hota tha rawan

ab wufur-e-gham se meri chashm-e-tar KHun-rez hai

aarzu tak ho gai dil ke liye bar-e-garan

na-tawani ke sabab arman bhi hasrat-KHez hai

hai abas saman-e-farhat gham-zada dil ke liye

mere lab ko KHud tabassum se baDa parhez hai

din gae tafrih ke jab se hua dil gham-kada

kya gharaz hum ko agar duniya tarab-angez hai

is zamin par kar raha hai tai masafat har-nafas

wo mubarak hai qadam jis ka safar mein tez hai

qalb-e-'hafiz' ta-dam-e-aKHir na paega sukun

jumla-saman-e-tarab-angez wahshat-KHez hai