dil mein mere KHayal-e-ruKH-e-mah-jabin raha

dil meñ mire ḳhayāl-e-ruḳh-e-mah-jabīñ rahā

saaya parī kā shīshe meñ sūrat-guzīñ rahā

allah re mere baḳht kī shūmī ki vasl meñ

parde hī meñ hijāb ke vo nāznīñ rahā

us but kī bandagī se na baaz aaya but-parast

kam-baḳht dil muḳhālif-e-shar.a-e-matīñ riyā

mahsūr-e-ġham huuñ nuqta-e-parkār kī tarah

maiñ markaz-e-mazālim-e-arbāb-e-kīñ rahā

ḳhūn-e-jigar se ziist kī ummīd thī magar

vo bhī ba-hukm-e-shar.a-e-mohabbat nahīñ rahā

hāsil huā na bahr-e-tasavvur meñ durr-e-vasl

har chand dil misāl-e-sadaf tah-nashīñ rahā

'maz.har' harīs-e-lazzat-e-ġham un ke ishq meñ

pāband tujh sā ai magas-e-angbīñ rahā

dil mein mere KHayal-e-ruKH-e-mah-jabin raha

saya pari ka shishe mein surat-guzin raha

allah re mere baKHt ki shumi ki wasl mein

parde hi mein hijab ke wo naznin raha

us but ki bandagi se na baz aaya but-parast

kam-baKHt dil muKHalif-e-shara-e-matin riya

mahsur-e-gham hun nuqta-e-parkar ki tarah

main markaz-e-mazalim-e-arbab-e-kin raha

KHun-e-jigar se zist ki ummid thi magar

wo bhi ba-hukm-e-shara-e-mohabbat nahin raha

hasil hua na bahr-e-tasawwur mein durr-e-wasl

har chand dil misal-e-sadaf tah-nashin raha

'mazhar' haris-e-lazzat-e-gham un ke ishq mein

paband tujh sa ai magas-e-angbin raha